म. टा. विशेष प्रतिनिधी, मुंबई
काँग्रेसने आरे वाचवण्याचा नारा देत रविवारी आरेमध्ये वृक्षपूजन केले. आरेसाठी शिवसेनेने ठाम भूमिका घ्यावी आणि भाजपची साथ न घेता लढावे, असे आव्हान काँग्रेस नेते संजय निरुपम यांनी शिवसेनेला दिले.
संजय निरुपम यांच्यासोबत एकनाथ गायकवाड, वर्षा गायकवाड आदी नेते देखील यावेळी उपस्थित होते. शिवसेना महापालिकेमध्ये सत्ताधारी असताना महापालिकेकडून झाडे तोडण्याची अंतिम मंजुरी कशी दिली जाते, असा प्रश्न निरुपम यांनी विचारला. दरम्यान, आरेसाठी आझाद मैदानातही आंदोलन करण्यात आले. मनसेच्या माध्यमातून हे आंदोलन करण्यात आले.
या निमित्ताने सत्ताधारी भाजप वगळता शिवसेना, काँग्रेस, राष्ट्रवादी आणि मनसे असे सगळे पक्ष आरे वाचवण्यासाठी एकवटले असल्याचे स्पष्ट होते. तरीही आरे वाचवण्यासाठी लहानांपासून मोठ्यांपर्यंत सर्वांनाच लढावे लागत आहे हेसुद्धा रविवारी झालेल्या आंदोलनामुळे दिसले. यामध्ये सुमारे दोन हजाराहून अधिक मुंबईकर आरे येथे जमले होते, तर वांद्रे येथे सेंट पीटर्स चर्च येथे सह्यांची मोहीम राबवण्यात आली.