उद्धव ठाकरेंचं नाव 'गिनीज' बुकात नोंदवा!

मटा ऑनलाइन वृत्त । मुंबई

'महाराष्ट्रातील भाजप सरकारचा पाठिंबा काढून घेऊ' हे वाक्य सर्वाधिक वेळा उच्चारल्याबद्दल शिवसेनेचे पक्षप्रमुख उद्धव ठाकरे यांचं नाव गिनीज बुकात नोंदवण्यात यावं, अशी मागणी काँग्रेसचे नेते नारायण राणे यांचे पुत्र, आमदार नीतेश राणे यांनी केली आहे. तसा अर्जच त्यांनी 'गिनीज बुक ऑफ वर्ल्ड रेकॉर्ड'कडं केला आहे.

नारायण राणे यांची शिवसेनेतून हकालपट्टी झाल्यापासून राणे व ठाकरे कुटुंबात नेहमीच शाब्दिक कलगीतुरा रंगत आला आहे. नारायण राणे सध्या शांत असले तरी त्याचे दोन्ही पुत्र आमदार नीतेश राणे व माजी खासदार नीलेश राणे हे शिवसेना नेतृत्वावर अधूनमधून टीका करत असतात. शेतकरी आंदोलनाच्या मुद्द्यावरून राज्यातील सत्ताधारी सेना-भाजपमध्ये पुन्हा बिनसलं आहे. भाजपला आमचा 'तत्वत: पाठिंबा' असल्याचा इशारा सेनेनं दिला आहे. तोच धागा पकडून नीतेश यांनी उद्धव यांना डिवचण्याची संधी साधली आहे. उद्धव ठाकरे यांचं नाव 'गिनीज'मध्ये नोंदवण्यात यावं, अशी विनंती करणारं पत्रच त्यांनी ट्विट केलं आहे.
Shiv Sena truly deserves..hope they get it @world_guiness pic.twitter.com/AcNcPP9GlS — nitesh rane (@NiteshNRane) June 14, 2017 'महाराष्ट्र राज्य हे कार्यक्षेत्र असलेला शिवसेना नावाचा एक राजकीय पक्ष भारतात आहे. उद्धव ठाकरे हे या पक्षाचं नेतृत्व करतात. त्यांच्या नावे आम्हाला एका विक्रमाची नोंद करायची आहे. 'आमचा पक्ष महाराष्ट्र सरकारचा पाठिंबा काढून घेईल', ही घोषणा सर्वाधिक वेळा करण्याचा विक्रम त्यांनी केला आहे. त्यांच्या या विक्रमाची आपण नोंद घ्यावी, अशी विनंती आहे. अशा प्रकारचा हा पहिलाच विक्रम असेल. माझ्या या पत्रालाच अर्ज समजण्यात यावं आणि त्यावर लवकरात लवकर कार्यवाही करावी, असंही नीतेश यांनी पत्रात म्हटलं आहे. नीतेश यांच्या या टीकेला शिवसेना काय प्रत्युत्तर देते हे पाहावं लागणार आहे.