शिवसेनेची वर्तणूक ५ वर्षांच्या मुलासारखी!

मटा ऑनलाइन वृत्त । मुंबई

शिवसेनेचे वय पन्नास वर्षे झाले असले तरी त्यांची वर्तणूक मात्र पाच वर्षांच्या लहान मुलासारखी आहे. नाइटलाइफ आणि ओपन जिमपाठोपाठ आता बालहट्टाचा तिसरा अंक म्हणजे भायखळा येथील जिजामाता उद्यानात दाखल झालेले पेंग्विन आहेत, अशी टीका काँग्रेस आमदार नितेश राणे यांनी केली आहे.

'मुंबईच्या वातावरणात पेंग्विन जगतील का? हा खरा प्रश्न असून याबाबत आधी अभ्यास करण्याची गरज होती. मात्र बालहट्टासमोर झुकून हा निर्णय घेण्यात आला आहे. मुंबईतील वातावरणात पेंग्विन जगणे अशक्य असल्याने उद्या त्यांचे काही बरेवाईट झाल्यास त्याची जबाबदारी कोण घेणार? त्यानंतर महापौर, नगरसेवक आणि संबंधित पदाधिकाऱ्यांना बळीचा बकरा बनवण्यात येईल. पण बालहट्ट करणाऱ्यावर कुणीही बोट दाखवणार नाही', असा टोला नितेश यांनी लगावला.

मुंबईत रस्ते, कचरा, पाणी आणि नाल्यांच्या प्रश्नांवर लक्ष द्यायचे सोडून मुंबईकरांच्या डोक्यावर पेंग्विन आणून का बसवताय?, असा सवालही त्यांनी केला.