म. टा. प्रतिनिधी, मुंबई
दिल्लीतील महाराष्ट्र सदन बांधकामाच्या घोटाळ्याप्रकरणी गेले सुमारे दोन महिने तुरुंगात असलेले राष्ट्रवादी काँग्रेसचे नेते छगन भुजबळ यांनी विविध व्याधींच्या आधारे वैद्यकीय कारणासाठी केलेला जामीन अर्ज शुक्रवारी न्यायालयाने फेटाळून लावल्याने भुजबळ यांना तुरुंगातच राहावे लागणार आहे.
प्रकरणी न्या. पी. आर. भावके यांच्यापुढे बुधवारी सुनावणी होऊन राखून ठेवलेला निकाल देण्यात आला. जामिनाला विरोध करताना सक्तवसुली संचालनालयाने (ईडी) आमचा तपास अद्याप सुरू असून ऑर्थर रोड तुरुंग प्रशासनाकडून भुजबळ यांच्या प्रकृतीची सर्व काळजी घेतली जात असल्याचे स्पष्ट केले. ते ग्राह्य धरीत न्या. भावके यांनी भुजबळ यांचा जामीन अर्ज फेटाळून लावला. ईडीतर्फे अॅड. पूर्णिमा कंथारिया यांनी भुजबळ यांना गेल्या १५ वर्षापासून आजार असून त्या आजारांसह ते जगत असल्याचे प्रतिपादन केले. आवश्यक ती सर्वोत्तम वैद्यकीय सेवा देण्याचेही आश्वासन त्यांनी दिले. भुजबळ यांचे पुत्र पंकज भुजबळ आणि अन्य ३३ आरोपींविरुद्ध सक्तवसुली संचालनालयाने (ईडी) बिगर जामीनपात्र वॉरंट मिळविले आहे. त्याची मुदत संपल्याने ती वाढवून देण्याची विनंती ‘ईडी’ने केल्याने १३ जूनपर्यंत मुदत वाढविण्यात आली आहे. तोपर्यंत पंकज भुजबळ व अन्य आरोपींना अटक करून न्यायालयापुढे आणण्याची जबाबदारी ‘ईडी’ची आहे.