म. टा. खास प्रतिनिधी, मुंबई
पश्चिम रेल्वेपाठोपाठ मध्य रेल्वेवर बम्बार्डियर लोकल चालवल्यानंतर हार्बरवरदेखील ती चालवली जाईल, अशी चर्चा सुरू झाली होती. मात्र सध्या तरी हे स्वप्न अपूर्ण राहिले आहे. या मार्गावर सिमेन्स, भेलच्या लोकल चालवण्यात येत असल्याने बम्बार्डियरची नव्याने भर घालणे योग्य नाही. त्यासह वेगवेगळ्या पद्धतीच्या लोकल चालवण्याचा ताण मोटरमनवर पडण्यासारख्या अनेक मुद्द्यांमुळे हार्बरवर बम्बार्डियर लोकल चालवण्यात येणार नसल्याचे स्पष्ट झाले आहे.
पश्चिम, मध्य रेल्वेपाठोपाठ हार्बरवर बम्बार्डियर लोकल चालवण्याची चर्चा वारंवार करण्यात येत आहे. त्याची घोषणा मध्य रेल्वेकडून केली जाणे अपेक्षित असताना प्रत्यक्षात रेल्वेने तशी कोणतीही योजना नसल्याचे स्पष्ट केले आहे. त्यामुळे हार्बरवासीयांची निराशा होणार आहे. बम्बार्डियर लोकल अधिक आरामदायी असून त्यात वायूविजनाची सुविधाही चांगली आहे.
अशातच, मध्य रेल्वेस पश्चिम रेल्वेकडून ११, तर रेल्वे बोर्डाकडून १३ बम्बार्डिअर अशा २४ गाड्या मिळणार आहेत. त्यातील किमान एक बम्बार्डिअर लोकल हार्बरवर चालवण्याचा मानस प्रत्यक्षात येणार नसल्याचे स्पष्ट झाले आहे.
सिमेन्स, बम्बार्डियर, भेल (भारत हेवी इलेक्ट्रिकल लि.) लोकलमधील मोटरमन केबिनमधील नियंत्रण यंत्रणा वेगवेगळी आहे. त्यामुळे या तिन्ही पद्धतीच्या लोकलचे व्यवस्थापन, नियंत्रण साधणे मोटरमन वर्गास कठीण जाते. त्यामुळे अनेकदा एका विभागीय स्तरावर एकाच पद्धतीच्या लोकलचा ताफा ठेवण्यात यावा, असा आग्रह काही ज्येष्ठ अधिकारी धरत असतात. त्यामुळे मोटरमननावेगवेगळ्या प्रकारच्या लोकल चालवण्याची परीक्षा वारंवार द्यावी लागणार नाही, असे मत व्यक्त केले जाते.