‘आवाजी’ फटाक्यांवरील बंदीला विक्रेत्यांचा सुरूंग

म. टा. खास प्रतिनिधी, मुंबई

कानठळ्या बसवणारे सुतळी बॉम्ब, तडतड वाजणाऱ्या दहा हजार फटाक्यांच्या माळा यांवर निर्बंध आणावेत अशा महाराष्ट्र प्रदूषण नियंत्रण मंडळाच्या सूचना असतानाही मोठ्या प्रमाणावर ध्वनी व वायूप्रदूषण करणारे हे दोन्ही प्रकारचे फटाके बाजारात सर्रास उपलब्ध असल्याचे दिसून येत आहे. अशा निर्बंधाबाबत किरकोळ फटाकेविक्रेत्यांना काहीच कल्पना नसून, त्यामुळे फटाक्यांच्या आवाजावर यंदाही कोणतेच नियंत्रण नसेल, असे दिसते.

महाराष्ट्र प्रदूषण नियंत्रण मंडळाने सुतळी बॉम्ब आणि दहा हजारी माळ बाजारात येऊ नये यासाठी नागपूर येथील विस्फोटक नियंत्रकांना सूचना दिल्या होत्या. मात्र, हे दोन्ही फटाके मार्केटमध्ये सहज उपलब्ध आहेत. स्थानिक मार्केटमध्ये शनिवारी रात्रीपासून फटाक्यांचे स्टॉल लागले आहेत. या स्टॉलवर प्रामुख्याने फुलबाज्या, अनार, भुईचक्रे यांची विक्री होत असताना सुतळी बॉम्ब, लक्ष्मी बॉम्ब, लवंगी आणि पाच-दहा हजारांच्या माळाही विकल्या जात आहेत. हे फटाके विकत घेणाऱ्या ग्राहकांनाही त्यांच्यामुळे होणाऱ्या ध्वनी वा वायूप्रदूषणाशी घेणेदेणे नसून, ‘आवाज दणदणीत होणार ना?’ यातच त्याला स्वारस्य आहे.