खाण्यास अयोग्य बर्फ आता निळ्या रंगात

म. टा. विशेष प्रतिनिधी, मुंबई

बर्फाचा वापर खाद्यपदार्थांमध्ये तसेच उद्योगासाठीही केला जातो. मात्र औद्योगिक कारणास्तव वापरण्यात येणारा, पिण्यास अयोग्य असलेल्या पाण्यापासून तयार केलेला बर्फ अनेकदा खाद्यपदार्थातही वापरला जात असल्याचे निदर्शनास आले आहे. हा बर्फ ओळखता येत नसल्याने ग्राहकांची फसवणूक होते, हे टाळण्यासाठी अखाद्य बर्फात निळसर रंग टाकण्याबाबतचे निर्देश दिले आहेत, अशी माहिती अन्न व औषध प्रशासन मंत्री गिरीश बापट यांनी बुधवारी निवेदनाद्वारे विधानसभेत दिली.

खाण्यासाठी सुरक्षित व दर्जेदार अन्न पुरविण्याची जबाबदारी अन्न सुरक्षा व मानके कायदा राबविणाऱ्या यंत्रणेची आहे. खाण्यास अयोग्य असलेला बर्फ ओळखता येत नसल्याने आरोग्याची हानी होऊ शकते. ही बाब विचारात घेऊन खाण्यास योग्य आणि अयोग्य बर्फ ओळखण्यासाठी, खाण्यास योग्य असलेल्या बर्फात कोणताही रंग टाकू नये तसेच अखाद्य बर्फात निळसर रंग टाकावा, असे आदेश देण्यात आले आहेत. याची अंमलबजावणी करण्याचे निर्देश अन्न सुरक्षा आयुक्तांना दिल्याची माहिती बापट यांनी या निवेदनाद्वारे दिली.