म. टा. खास प्रतिनिधी, मुंबई
ओला, उबर टॅक्सीसेवांच्या मालक-चालकांनी आज, २२ ऑक्टोबर रोजी विविध मागण्यांसाठी आंदोलन पुकारले आहे. कुर्ला येथील फिनिक्स मॉल येथील उबर कंपनीच्या कार्यालयावर महाराष्ट्र राज्य राष्ट्रीय कामगार संघातर्फे सकाळी ११ वाजता आंदोलन केले जाणार आहे. त्यात मोठ्या प्रमाणात खासगी टॅक्सीचालक, मालक सहभागी होण्याची शक्यता आहे. तसे झाल्यास सोमवारी या सेवांच्या उपलब्धततेवर परिणाम होण्याची भीती आहे.
पेट्रोल, डिझेल, सीएनजी दरात वाढ झाली असली तरीही ओला, उबरने भाडेदरात वाढ न करता उलट चालक-मालकांचे प्रति किमी दर घटविल्याचा आरोप संघातर्फे केला जात आहे. या सर्वातून चालक-मालकांना बरेच नुकसान होत असून प्रत्येक किमीच्या दरांमध्ये वाढ करण्याची मागणी करण्यात येत आहे. कंपनीने नवीन गाड्या ताफ्यात न आणता अन्य चालकांच्या गाड्यांना समान पद्धतीने कामे द्यावीत, अन्य गाड्यांना किमान व्यवसाय हमी द्यावी, अशाही त्यांच्या मागण्या आहेत.