म. टा. विशेष प्रतिनिधी, मुंबई
राज्यभरातील सर्व तुरुंगांमध्ये १३ जूनपर्यंत कैदी व तुरुंग कर्मचारी मिळून एकूण १७ हजार ६९५ जणांचे ताप व श्वासाचे ठोके इत्यादीविषयी 'स्क्रीनिंग' करण्यात आले. तर १६८१ जणांच्या स्वॅब नमुन्यांची चाचणी करण्यात आली. त्यानंतर एकूण २६९ कैदी व ७३ तुरुंग कर्मचारी करोना पॉझिटिव्ह आढळले. त्यापैकी ११५ कैदी व ५१ तुरुंग कर्मचारी उपचारांनंतर बरे झाले. तळोजा मध्यवर्ती तुरुंगात दोन आणि येरवडा मध्यवर्ती तुरुंग व धुळे जिल्हा तुरुंगात प्रत्येकी एक अशा चार कैद्यांचा करोनामुळे मृत्यू झाला, अशी माहिती राज्याच्या तुरुंग विभागाने सोमवारी मुंबई उच्च न्यायालयात दिली.
तुरुंगांमध्ये करोनाचा शिरकाव होऊनही कैद्यांविषयीचा तपशील सांगितला जात नसल्याने त्यांचे कुटुंबीय हवालदिल झाले असल्याचे निदर्शनास आणणाऱ्या जनहित याचिका 'पीपल्स युनियन सिव्हिल लिबर्टीज', कृतिका अगरवाल आणि गीता जैन यांनी केल्या आहेत. त्यात मुख्य न्यायमूर्ती दीपांकर दत्ता व न्या. एस. एस. शिंदे यांच्या खंडपीठाने तुरुंगांमध्ये लक्षणे नसलेल्या आणि करोनाबाधिताशी संपर्क आल्याने तीव्र धोका असलेल्या अशा कैद्यांची करोना चाचणी करण्याबाबत कोणती पद्धत अवलंबली जात आहे, आयसीएमआरने दिलेल्या मार्गदर्शक तत्त्वांचे पालन केले जात आहे का, याविषयी उत्तर मागितले होते. त्याप्रमाणे अपर पोलिस महासंचालक (कारागृह) सुनील रामानंद यांनी सोमवारी अहवाल सादर केला. 'पुरेशा विलगीकरण सुविधेविषयी जोपर्यंत प्रशासनांकडून ग्वाही मिळत नाही, तोपर्यंत सरसकट सर्व कैद्यांची करोना चाचणी करणे अशक्य आहे', असे रामानंद यांनी आपल्या उत्तरात स्पष्ट केले.
'कैद्यांना त्यांचे कुटुंबीय व वकिलांशी फोनवर बोलता यावे यादृष्टीने १२ फेब्रुवारीच्या परिपत्रकाप्रमाणे सुविधा द्यावी, असे सर्व तुरुंग अधीक्षकांना पुन्हा सांगितले आहे. तसेच त्यासाठी अतिरिक्त मोबाईल फोन खरेदी करण्याची परवानगीही १४ जूनच्या पत्राद्वारे दिली आहे', असेही रामानंद यांनी नमूद केले.
'ठाण्यात अद्याप तात्पुरते तुरुंग नाही'
ठाणे मध्यवर्ती कारागृहात कैद्यांची खूपच गर्दी आहे. त्यामुळे तात्पुरत्या तुरुंगाची सुविधा सुरू करण्याची विनंती त्या तुरुंग अधीक्षकांनी ठाणे जिल्हाधिकाऱ्यांना केली होती. मात्र, अद्याप असे तात्पुरते तुरुंग सुरू करण्यात आलेले नाही, अशी माहितीही रामानंद यांनी अहवालात दिली.
राज्यभरातील तुरुंगांतील करोना स्थिती (१३ जूनपर्यंत)
एकूण स्क्रीनिंग : १७ हजार ६९५ (कैदी आणि तुरुंग कर्मचारी)
चाचणी : १६८१ (कैदी आणि तुरुंग कर्मचारी)
पॉझिटिव्ह कैदी : २६९ (११५ नंतर बरे झाले)
पॉझिटिव्ह कर्मचारी : ७३ (५१ नंतर बरे झाले)
करोनाने एकूण मृत्यू : चार कैदी
आर्थर रोड तुरुंगातील करोना स्थिती (१३ जूनपर्यंत)
एकूण स्क्रीनिंग : २०८२ (कैदी आणि तुरुंग कर्मचारी)
चाचणी : ५४५ (कैदी आणि तुरुंग कर्मचारी)
पॉझिटिव्ह कैदी : १५८ (९८ नंतर बरे झाले)
पॉझिटिव्ह कर्मचारी : ३९ (३७ नंतर बरे झाले)
एकूण मृत्यू : एकही नाही