जागेला सोन्याचा भाव असणाऱ्या गिरगावात सोसायटीच्या पदाधिकाऱ्यांचा प्रताप; इमारतीचा अख्खा तळमजलाच विकला

म. टा. खास प्रतिनिधी, मुंबई : गिरगावच्या ऑपेरा हाऊस परिसरातील मेहता महल या इमारतीचा तळमजलाच सोसायटीच्या पदाधिकाऱ्यांनी रहिवाशांच्या नकळत एका कंपनीला विकल्याचा प्रकार समोर आला आहे. याबाबत रहिवाशांच्या तक्रारीनंतर आलेल्या पोलिसांना तळमजल्याच्या रक्षणासाठी ठेवलेल्या सुरक्षारक्षकांनी धक्काबुक्की केली. याप्रकरणी रहिवाशांनी केलेल्या तक्रारीवरून सोसायटीच्या पदाधिकाऱ्यांविरुद्ध दादासाहेब भडकमकर मार्ग पोलिस ठाण्यात गुन्हा दाखल करण्यात आला आहे.

काय आहे प्रकरण?

ऑपेरा हाऊस परिसरात मेहता महल ही इमारत असून या इमारतीचा तळघराची जागा रहिवाशांसाठी मोकळी ठेवण्यात आली होती. काही दिवसांपासून रहिवाशांना या ठिकाणी जाण्यापासून रोखण्यात येत होते. या ठिकाणी काही बांधकामही करण्यात आले होते. याबाबत अडवताच सोसायटीच्या पदाधिकाऱ्यांनी उडवाउडवीची उत्तरे दिली. त्यामुळे अन्य सदस्यांनी पालिकेकडे तक्रार केली. पालिकेने यासंदर्भात नोटीस पाठवूनही काहीच उपयोग न झाल्याने सदस्यांनी सोसायटीच्या पदाधिकाऱ्यांविरुद्ध न्यायालयात धाव घेतली. त्यावेळी या पदाधिकाऱ्यांनी बनावट कागदपत्रे आणि स्वतःच्या अधिकाराचा गैरवापर करून अख्ख तळघरच एका खासगी कंपनीला विकल्याचे समोर आले. न्यायालयाने याबाबत कारवाई करण्याचे आदेश पोलिसांना दिले.
Nagpur Crime: बाळाला दूध पाजलं अन् झोपी गेली, काही वेळाने जाग आली तर ५ महिन्यांचं बाळ गायब
दादासाहेब भडकमकर मार्ग पोलिसांचे पथक घटनास्थळी पाहणी करण्यासाठी गेले असता सुरक्षारक्षकांनी त्यांनाही रोखले. गैरव्यवहार झाल्याचे लक्षात आल्यावर न्यायालयाच्या आदेशानंतर आणि सदस्यांच्या तक्रारीवरून पोलिसांनी सोसायटीच्या पदाधिकाऱ्यांवर गुन्हा दाखल केला आहे. यामध्ये पालिकेच्या अधिकाऱ्यांचा हात असल्याचा आरोप मेहता महलमधील रहिवाशांनी केला आहे.