जुन्या पेपर विक्रेत्यांना महापालिकेचा जाच

पालिका आयुक्तांच्या आश्वासनानंतरही कारवाई

म. टा. प्रतिनिधी, मुंबई

मुंबईतील पेपर विक्रेत्यांवर कोणत्याही प्रकारची कारवाई होणार नसल्याचे आश्वासन मुंबई महापालिकेचे आयुक्त अजोय मेहता यांनी दिलेले असतानाही पालिकेतर्फे या विक्रेत्यांवर कारवाई सुरू असल्याचे दिसून आले आहे.

घाटकोपर परिसरातील पेपर विक्रेत्यांवर गेले दोन दिवस कारवाई करण्यात आल्याची धक्कादायक माहिती समोर आली असून यात ३० ते ४० वर्षांपासूनच्या जुन्या स्टॉलचा समावेश आहे. मुंबई महानगरपालिकेतर्फे सध्या फूटपाथवरील दुकानांवर कारवाई करण्याची मोहीम हाती घेण्यात आली आहे. यात मुंबईतील अनेक वृत्तपत्रे विक्रेत्यांचा समावेश असल्याने त्यांच्यावर कारवाई करू नये, अशी मागणी वृत्तपत्रे विक्रेत्यांनी आयुक्तांकडे केली होते. त्यानुसार या पेपर विक्रेत्यांवर कारवाई न करण्याचे आश्वासन पालिका आयुक्तांनी दिले होते. त्यानंतरही घाटकोपर बस डेपोजवळील दिगंबर दळवी यांच्या स्टॉलवर शुक्रवारी कारवाई झाली. दळवी यांना पूर्वकल्पना न देता ही कारवाई करण्यात आल्याचे ते सांगतात. दळवी ३२ वर्षांपासून येथे स्टॉल लावत असून सध्या पावसाळा असल्याने त्यांनी काही दिवसांपूर्वीची शेड लावली होती. त्यामुळे पालिकेने त्यांच्यावर कारवाई केल्याची माहिती दळवी यांनी दिली. शेड काढून टाकतो, असे सांगितल्यानंतरही पालिका अधिकाऱ्यांनी स्टॉलवर बुलडोझर चालविल्याची खंत त्यांनी व्यक्त केली.

अशीच काहीशी कारवाई घाटकोपर भटवाडी येथे ४५ वर्षांपासून स्टॉल लावणाऱ्या वसंत वैभव यांच्या स्टॉलवर करण्यात आली आहे. भटवाडी येथील आशीर्वाद हॉटेलजवळ त्यांचा स्टॉल असून सोमवारी पालिकेने त्यांच्या स्टॉलवर कारवाई केली. पालिका आयुक्तांनी आम्हाला आश्वासन दिल्याचे अधिकाऱ्यांना सांगितल्यानंतरही त्यांनी कारवाई केली. येथील इतर फेरीवाल्यांवर कारवाई करण्यात येणार असल्याचे अधिकाऱ्यांनी तीन दिवसांपूर्वी सांगितले होते. मात्र पेपर स्टॉलवर कारवाई न करण्याची ग्वाही त्यांनीही दिली होती. मात्र सोमवारी अचानक कारवाई करण्यात आली. शेड काढण्याची तयारी दर्शवल्यानंतरही अधिकाऱ्यांनी कारवाई केलीच, असे वसंत वैभव सांगतात. घाटकोपर परिसरात आणखी काही स्टॉलवर कारवाई करण्यात आली असून पेपर स्टॉल विक्रेत्यांमध्ये नाराजी व्यक्त होत आहे.