‘हिरानंदानी’ प्रकरणानंतर झाले पहिले प्रत्यारोपण

म. टा. विशेष प्रतिनिधी, मुंबई

‌हिरानंदानी किडनी रॅकेटनंतर अवयवदानाच्या चळवळीला धक्का बसला असे वाटत असताना ठाण्यातील ज्युपिटर रुग्णालयात गुरुवारी पहाटे एका ब्रेनडेड रुग्णाच्या लिव्हरचे व डोळ्यांचे दान झाले. त्यामुळे तीनजणांना नवीन जीवन मिळाले आहे.

महानगर टेलिफोन निगममधून निवृत्त झालेल्या ६९ वर्षांच्या एका अधिकाऱ्याच्या मेंदूत रक्तस्त्राव झाला. त्यामुळे त्यांना पुढील उपचारांसाठी ज्युपिटर रुग्णालयात दाखल केले. पण डॉक्टरांनी १८ ऑगस्टला त्यांना ब्रेनडेड घोषित केले. १६ ऑगस्ट रोजीच त्यांचा वाढदिवस झाला. रुग्णालयाच्या ट्रान्सप्लान्ट कोऑर्डिनेटरनी रुग्णाच्या मुलाला अवयवदान चळवळीचे महत्त्व सांगितले. त्यानंतर कुटुंबीयांनी अवयवदानाचा निर्णय घेतला. या रुग्णाच्या दोन्ही किडन्या निकामी झाला होत्या. त्यामुळे त्यांच्या किडन्यांचे दान करता आले नाही; पण लिव्हर व डोळ्यांचे दान करण्यात आले. रुग्णालयात प्रतिक्षायादीवर असलेल्या ५६ वर्षांच्या एक व्यक्तीवर लिव्हरचे प्रत्यारोपण करण्यात आले तर सय्यारा आय बँकेसाठी नेत्रदान करण्यात आले.