‘पुलं’ची संगीत लायब्ररीची इच्छा साकारणार!

म. टा. खास प्रतिनिधी, मुंबई

संगीतप्रेमी आणि संगीत अभ्यासकांना संगीत समजून घेण्यासाठी मुंबईमध्ये लायब्ररीची चांगली सोय नाही. विविध संदर्भ रेकॉर्ड, मैफली, घराण्यांमधील शैलीचा फरक समजून घेण्यासाठी थेट नरिमन पॉइंटचे एनसीपीए गाठावे लागते. यासाठीच विलेपार्ले येथे एक संगीत लायब्ररी उभी राहावी ही पु. ल. देशपांडे यांची इच्छा होती. त्यांची ही इच्छा पूर्ण करण्यासाठी त्यांचा पुतण्या जयंत देशपांडे यांनी पार्लेकरांच्या मदतीने पुढाकार घेतला आहे. डिजिटल तंत्रज्ञानाची मदत घेऊन ही लायब्ररी उभी राहणार आहे. त्यादृष्टीने कामाला सुरुवात झाली असून येत्या १५ दिवसांमध्ये या प्रकल्पाला मूर्त रूप येईल.

संगीत म्हणजे केवळ शास्त्रीय संगीत नाही. यामध्ये लोकसंगीत, माजघरातील गाणी, जात्यावरील गाणी याचाही समावेश होतो. त्यामुळे शास्त्रीय संगीत, गझल या व्यतिरिक्त लोकसंगीताच्या अभ्यासासाठीही ही संदर्भ लायब्ररी व्हावी असा प्रयत्न असल्याचे जयंत देशपांडे यांनी सांगितले. संगीताचे जतन व्हावे हा याचा प्रमुख उद्देश आहे. त्यामुळे संगीताशी संबंधित विविध दिग्गजांना यामध्ये सामावून घेतले जाणार आहे. सध्याच्या काळातील काही नामांकित गायकांशी त्यांच्या मैफलीच्या डिजिटल कॉपी पाठवण्यासाठी चर्चाही केली जात आहे. यात राशिद खान या प्रसिद्ध गायकाचाही समावेश आहे.

जयंत देशपांडे यांच्याकडे स्वतःचा संग्रह खूप मोठा आहे. त्याशिवाय पार्ल्यातील काही संगीतप्रेमींनी या लायब्ररीसाठी हातभार लावण्याचे आश्वासन दिले आहे. राघवेंद्र बेणगेरी या संगीतप्रेमींनी आपल्याकडील संगीतसंग्रह देशपांडे यांच्याकडे सोपवला होता. त्यांच्याकडे अनेक मैफलींचे रेकॉर्डिंग होते. त्यांचा हा खजिनाही संग्रहालयासाठी उपयुक्त ठरेल. या संग्रहालयाचे व्यापारीकरण करण्याची इच्छा नसून ते संगीतप्रेमींना निःशुल्क वापरता आले पाहिजे, असा मानस आहे. संगणकावर या मैफली उपलब्ध करून देण्यात येणार आहेत.

या लायब्ररीची विलेपार्ले उपनगराच्या बाहेरून अनेकांनी विचारणा केली आहे. मात्र ही लायब्ररी पार्ल्यातच व्हावी ही पुलंची इच्छा असल्याने पार्ल्यातच जागा शोधली जात आहे. यासाठी अनेक पार्लेकर मदत करतील, अशी आशा देशपांडे यांनी व्यक्त केली. भाईंच्या स्वप्नातील ही लायब्ररी भव्यदिव्यच असेल, असा विश्वासही त्यांनी या निमित्ताने व्यक्त केला आहे.