पाकिस्तानी कलाकारांबाबत सैफचा 'सेफ गेम'

मटा ऑनलाइन वृत्त । मुंबई

पाकिस्तानी कलाकारांविरोधात मनसेनं आक्रमक पवित्रा घेतला असताना आणि या कलाकारांचं समर्थन केल्यानं सिनेनिर्माता करण जोहर अडचणीत सापडला असताना अभिनेता सैफ अली खाननं या विषयाबाबत सावध पवित्रा घेतला आहे. सीमेपलीकडच्या प्रतिभावंतांसाठी भारतीय सिनसृष्टीची दारं नेहमीच खुली आहेत, पण त्यांना इथे येऊ द्यायचं की नाही, हा निर्णय सर्वस्वी सरकारने घ्यायचाय, अशी प्रतिक्रिया सैफनं व्यक्त केली.

उरीत हल्ला करणारे दहशतवादी पाकिस्तानी असल्याचे पुरावे मिळाल्यानंतर मनसेनं पाक कलाकारांना भारत सोडण्याची धमकी दिली होती. त्यांच्या या आक्रमक भूमिकेला मोठा पाठिंबा मिळाला, पण काहींनी त्याला विरोधही केला. या विरोधकांमध्ये करण जोहर आघाडीवर होता. 'ऐ दिल है मुश्किल' प्रदर्शित होऊ देणार नाही, असं मनसेनं ठणकावल्यामुळे त्यानं मनसेविरोधात टिप्पणी केली होती. त्यामुळे आता मनसे कार्यकर्त्यांनी त्याला लक्ष्य केलं आहे.

या पार्श्वभूमीवर, सैफ अली खानला पाकिस्तानी कलाकारांबद्दल विचारलं असता त्यानं एकदम 'सेफ' उत्तर दिलं. आम्ही कलाकार आहोत. आम्ही प्रेम आणि शांततेचाच आग्रह धरतो. देशादेशांतील सांस्कृतिक आदानप्रदानाला प्रोत्साहन मिळायला हवं. तिथल्या प्रतिभावान कलाकारांच्या स्वागताला बॉलिवूड कायमच तयार आहे. मात्र, कुणाला आपल्या देशात येऊ द्यायचं आणि कुणाला नाही, ही कायदेशीर बाब आहे आणि त्याबद्दल केंद्र सरकारनेच धोरण ठरवणं योग्य आहे, असं सैफ म्हणाला. त्यामुळे अनेक वाद त्याने टाळले आहेत.