पंकज भुजबळ यांची ED समोर शरणागती

मटा ऑनलाइन वृत्त । मुंबई

राष्ट्रवादी काँग्रेसचे नेते, माजी उपमुख्यमंत्री छगन भुजबळ यांचा मुलगा पंकज भुजबळ यांनी शनिवारी सक्तवसुली संचालनालयाच्या विशेष न्यायालयासमोर शरणागती पत्करली. त्यांची जामिनावर सुटका झाली आहे. बेहिशेबी मालमत्तेप्रकरणी पंकज यांची सक्तवसुली संचालनालयामार्फत चौकशी सुरू आहे.

छगन भुजबळ आणि त्यांचे पुतणे समीर भुजबळ यांना मागील वर्षी सक्तवसुली संचालनालयाने अटक केली होती, ते सध्या न्यायालयीन कोठडीत आहेत. 'पंकज यांनी शरणागती पत्करली आणि त्यांची २ लाख रुपयांच्या जामिनावर मुक्तता करण्यात आली,' असे त्यांचे वकिल शलभ सक्सेना यांनी सांगितले.

पंकज यांनी याआधी उच्च न्यायालयात अटकपूर्व जामिनासाठी अर्ज केला होता पण नंतर आपण विशेष न्यायालयासमोर शरण जाऊ असे सांगत त्यांनी तो मागे घेतला. सक्तवसुली संचालनालयाने पंकज यांना चौकशीदरम्यान अटक केली नव्हती, त्यामुळे त्यांना आज जामिन देण्यात आल्याची माहिती त्यांच्या वकिलांनी दिली.

सक्तवसुली संचालनालयाने छगन भुजबळ यांना महाराष्ट्र सदन घोटाळाप्रकरणी १४ मार्च २०१६ रोजी अटक केली होती.