पनवेल-पेण, दिवा-वसई मेमू सेवा आजपासून

म. टा. खास प्रतिनिधी, मुंबई

उपनगरांचा विस्तार होतानाच रेल्वे प्रवासी संख्याही वाढत गेल्याने सर्वच मार्गांवर ताण वाढला आहे. मात्र दिवा-वसई आणि दिवा-पनवेल-रोहापर्यंतच्या प्रवाशांना रेल्वेच्या विद्युतीकरण प्रकल्पाने मोठा आधार मिळणार आहे. आज, रविवारपासून पेण ते पनवेल मार्गावर डिझेलऐवजी लोकल आणि मेलच्या डब्यांचा संयोग साधलेल्या मेमू डब्यांची सेवा सुरू होणार आहे. खारकोपर येथे मुख्यमंत्री देवेंद्र फडवणीस, रेल्वेमंत्री पीयूष गोयल यांच्या उपस्थितीत पार पडणाऱ्या उद्घाटन सोहळ्यात या सेवेसही हिरवा कंदील दाखवला जाणार आहे.

मध्य रेल्वेची हद्द रोहापर्यंत असून त्यापुढे कोकण रेल्वेची हद्द सुरू होते. मध्य रेल्वेने पनवेलपासून पेणपर्यंत हाती घेतलेले विद्युतीकरणाचे काम पूर्ण झाले आहे. त्यामुळे या मार्गावर डिझेलवरील डेमूऐवजी विद्युत प्रवाहावरील मेमू गाड्या चालवल्या जातील. त्यामुळे इंधन बचत, देखभाल, दुरुस्तीत फायदा मिळणार आहे. मुख्य म्हणजे या विद्युतीकरणामुळे कोकण आणि पश्चिम घाट जोडणे अधिक सुलभ होईल, असा दावा केला जात आहे.

पनवेल ते पेण दरम्यानचे विद्युतीकरण हा पनवेल-पेण-थळ पट्ट्यातील विद्युतीकरणाचा भाग आहे. पनवेल ते पेण दरम्यान ओव्हरहेड वायरचे सुमारे २००० खांब, पुलांचे २३ सांगाडे, १०० पेक्षा जास्त मल्टी ट्रॅक पोर्टल, एक बोगदा बांधण्यात आला आहे. दिवा-वसई आणि दिवा-पनवेल-रोहा मार्गावरही मेमू धावणार आहे. या गाड्या प्रामुख्याने १२ डब्यांच्या असून ही सेवा प्रवाशांच्या दृष्टीने उपयुक्त ठरेल, अशी आशा व्यक्त केली जात आहे. उद्या, सोमवारपासून या सेवा नियमितपणे सुरू होणार आहेत. वसई-दिवा-पनवेल मार्गावर आठ फेऱ्या चालवल्या जातील.