१६०० विद्यार्थ्यांना सरासरी गुण

आगामी मूल्यांकनही ‘ऑनलाइन असेसमेंट’नेच

म. टा. प्रतिनिधी, मुंबई

मुंबई विद्यापीठाच्या ऑनलाइन असेसमेंटच्या प्रक्रियेत सरमिसळ झालेल्या १५०० ते १६०० उत्तरपत्रिका सापडत नसून, या विद्यार्थ्यांना सरासरी गुण देण्याचा निर्णय गुरुवारी झालेल्या अभ्यास मंडळाच्या बैठकीत घेण्यात आला. त्याबाबत मुंबई विद्यापीठाकडून रात्री उशिरा माहिती देण्यात आली असून सविस्तर घोषणा उद्या, शुक्रवारी केली जाणार आहे. विशेष म्हणजे, पुढील परीक्षांच्या मूल्यांकनासाठी ऑनलाइन असेसमेंट यंत्रणाच वापरण्यात येणार असून, वादग्रस्त ‘मेरिट ट्रॅक’ कंपनीकडूनच ते केले जाणार आहे.

मुंबई विद्यापीठाने ४७७ अभ्यासक्रमांच्या निकालांची घोषणा केली असली तरी अद्याप ११ हजार विद्यार्थ्यांचे निकाल राखीव ठेवण्यात आले आहेत. हजारो उत्तरपत्रिकांची सरमिसळ झाल्याने तशी नामुष्की विद्यापीठ प्रशासनावर ओढवली आहे. त्यामुळे या विद्यार्थ्यांना सरासरी गुण देण्यासंदर्भात गुरुवारी अभ्यास मंडळाची विशेष बैठक आयोजित करण्यात आली होती. या बैठकीत सर्व शाखांचे डीन आणि परीक्षा व मूल्यामापन मंडळाचे संचालक अर्जुन घाटुळे उपस्थित होते. या बैठकीत सविस्तर चर्चा करण्यात येऊन सरासरी गुण देण्याच्या निर्णयावर शिक्कामोर्तब करण्यात आले.

या निर्णयाला अर्जुन घाटुळे यांनी पुष्टी दिली आहे. ‘ऑनलाइन असेसमेंटच्या प्रक्रियेत १५०० ते १६०० उत्तरपत्रिका मिळालेल्या नाहीत. त्या गहाळ झालेल्या नाहीत, पण तांत्रिक अडचणींमुळे त्या अद्याप सापडलेल्या नाहीत. त्यामुळे या विद्यार्थ्यांना सरासरी गुण दिले जाणार आहेत’, असे त्यांनी स्पष्ट केले.

दरम्यान, आगामी परीक्षांचे मूल्यांकन हे ऑनलाइन पध्दतीनेच केले जाणार असून त्यासाठी सध्याचीच कंपनी नियमित करण्यात आली आहे. या कंपनीबरोबर एक वर्षाचा करार करण्यात आल्याने हा निर्णय घेण्यात आल्याचे विद्यापीठ प्रशासनाकडून स्पष्ट करण्यात आले आहे.