अभिनेत्री परवीन बाबीची ८० टक्के संपत्ती गरजूंना

मटा ऑनलाइन वृत्त । मुंबई

बॉलिवुड अभिनेत्री परवीन बाबी हिच्या मृत्यूपश्चात तिच्या संपत्तीच्या वाट्यावरून सुरू असलेल्या वादावर अखेर ११ वर्षांनंतर मुंबई उच्च न्यायालयाने पडदा पाडला. तिच्या संपत्तीचा ८० टक्के हिस्सा गरजू महिला आणि मुलांच्या मदतीकरता जाणार आहे. २००५ मध्ये परवीनचा गूढ मृत्यू झाला होता.

परवीनच्या काकांनी तिच्या संपत्तीच्या वाट्याकरिता, तिच्या मृत्यूपत्राला आव्हान देणारी याचिका न्यायालयात दाखल केली होती. पण न्यायालयाने तिच्या मृत्यूपत्राला मंजुरी दिली. यानुसार तिच्या मामाला तिच्या संपत्तीचा २० टक्के भाग मिळणार आहे.

परवीनचे हे मृत्यूपत्र तिच्या मामाने २००५ मध्ये न्यायालयाकडे सुपूर्द केले होते, पण तिच्या वडिलांकडील नातेवाईकांनी हे मृत्यूपत्र बनावट असल्याचा दावा केला होता. परवीनच्या नावे जुहूमधला समुद्रकिनाऱ्याजवळचा चार बेडरुमचा फ्लॅट, जुनागढ इथली हवेली, सोने, बॅंकेत असलेले २० लाख रुपयांचे फिक्स्ड डिपॉझिट आणि अन्य पैसे इतकी संपत्ती आहे.

तिच्या मृत्यूपत्रानुसार, तिच्या ८० टक्के संपत्तीचा वापर करून एक ट्रस्ट स्थापन केला जाईल. गरजू महिला आणि जुनागढमधली बाबी समाजातल्या मुलांना मदत केली जाईल. हा ट्रस्ट तिचे ८२ वर्षीय मामा मुरादखान बाबी चालवतील. हे काकाच परवीनला सर्वात जवळचे होते. तिच्या संपत्तीतला २० टक्के हिस्साही त्यांनाच मिळाला आहे. तिच्या ट्रस्टच्या निधीतला १० टक्के भाग अहमदाबादच्या सेंट झेवियर्स कॉलेजला दिला जाणार आहे. मॉडेलिंग क्षेत्रात येण्यापूर्वी तिने याच कॉलेजमधून इंग्रजी साहित्यातून पदव्युत्तर पदवी प्राप्त केली होती. परवीन नेमकी किती संपत्ती मागे ठेवून गेली आहे, हे मात्र अजून स्पष्टपणे कळलेले नाही. ही संपत्ती स्टेट अॅडमिनिस्ट्रेटर जनरल आणि ऑफिशिअल ट्रस्टीच्या कस्टडीत होती.

१९७० आणि ८० च्या दशकात हिंदी सिनेमा गाजवणारी परवीन बाबी २२ जानेवारी २००५ ला आपल्या जुहू येथील फ्लॅटमध्ये मृतावस्थेत आढळली होती. ५६ वर्षांची परवीन या फ्लॅटमध्ये एकटीच राहत असे. मधुमेहामुळे झालेल्या समस्येमुळे तिचा मृत्यू झाल्याची शक्यता वर्तवण्यात आली होती. तिच्या घराबाहेर तीन दिवसांपासून साचलेली वर्तमानपत्रे आणि दुधाच्या पिशव्या पाहून शेजाऱ्यांनी पोलिसात तक्रार केली होती. पोलिसांनी दरवाजा तोडला तेव्हा ती मृतावस्थेत आढळली.