पेंग्विन दर्शनासाठी पर्यटकांची उत्साही गर्दी

मटा ऑनलाइन वृत्त । मुंबई

सुट्टीच्या दिवसाचे औचित्य साधत हजारो मुंबईकरांनी पेंग्विन दर्शनासाठी भायखळा येथील राणीच्या बागेत प्रचंड गर्दी केली. पेंग्विन दर्शनासाठी उसळलेल्या गर्दीमुळे काही वेळेसाठी पेंग्विन कक्ष बंद करण्यात आला होता. मात्र, काही वेळेनंतर पर्यटकांना पेंग्विन पाहण्यासाठी सोडण्यात आले. सुमारे २० हजार पर्यटकांनी पेंग्विन दर्शन केले असल्याचा अंदाज वर्तवण्यात येत आहे.

राणीच्या बागेमधील पेंग्विन कक्षाचे शुक्रवारी लोकार्पण झाल्यानंतर शनिवारपासून मुंबईकरांना पेंग्विन पाहाण्यासाठी खुले करण्यात आले. शनिवारी सुमारे दहा हजार पर्यटकांनी हजेरी लावली होती. आज रविवारचा दिवस असल्यामुळे लहानग्यांपासून ज्येष्ठ नागरिकानी पेंग्विन पाहण्यासाठी गर्दी केली. दररोज सहा ते सात हजार पर्यटकांना प्रवेश देण्याचे पालिकेने निश्चित केले होते. मात्र, आज पर्यटकांनी केलेल्या प्रचंड गर्दीमुळे जास्त लोकांना पेंग्विन कक्षात सोडण्यात आले.

एकाच वेळेस जास्त प्रमाणात पय॔टकांना कक्षात सोडल्यास पेंग्विनवर ताण येऊ शकतो, असे त्यांच्या उपचारासाठी तैनात ठेवलेल्या डॉक्टरांनी पंधरा दिवसांपूर्वी सांगितले होते. त्यामुळे पेंग्विन कक्षात दररोज किती पय॔टक सोडावेत हे निश्चित करण्याची मागणी पक्षीप्रेमी तज्ञांनी केली आहे.