‘आदित्य यांच्या हट्टापायी पेंग्विन’

मुंबई ः मुंबईत धड रस्ते नाहीत, पिण्यासाठी पुरेसे पाणी नाही. त्यानंतरही आदित्य ठाकरे यांचा बालहट्ट पुरवण्यासाठी राणीबागेमध्ये पेंग्विन आणण्यात आल्याचा आरोप मनसेने केला आहे. आपली हौस पूर्ण करायची असल्यास ती स्वतःच्या खिशातल्या पैशांतून करावी. मुंबईकरांच्या खिशात कशाला हात घालता असा टोला मनसेने लगावला आहे.

पेंग्विनना उणे तापमानात ठेवावे लागते. मुंबईतील उष्ण तापमान लक्षात घेता फार तर दोन वर्ष पेंग्विन मुंबईच्या वातावरणात जगू शकतील असा तज्ज्ञांचा अंदाज आहे. पालिकेला हे माहित असतानाही आदित्य यांचा बालहट्ट पुरवण्यासाठी पेंग्विन आणण्यात आले आहेत. ‘मोठे मोठे धंदे आणि वडापावचे वांदे,’ अशी सध्या शिवसेनेची अवस्था झाल्याची टीका मनसेचे गटनेते संदीप देशपांडे यांनी केली आहे.