CSMT जवळचा हिमालय पूल तातडीने उभारा

हिमालय पूल पाडल्यानंतर या ठिकाणी सध्या दुभाजक तोडून सिग्नल बसवण्यात आला आहे. वाहनांनी वेग कमी करावा यासाठी झेब्रा क्रॉसिंगच्या पट्ट्या मारण्यात आल्या आहेत. या ठिकाणी वाहतूक पोलिसही तैनात असतात. असे असतानाही प्रवासी आणि वाहनचालक सर्रास नियम मोडताना दिसतात. त्यामुळे हा पूल तातडीने उभा राहण्याची गरज आहे...

..

सर्वसामान्यांसाठी सोय व्हावी

हिमालय पूल पूर्ववत सुरू व्हायला हवा, कारण त्या परिसरात येणाऱ्या-जाणाऱ्यांची संख्या जास्त आहे. भुयारी मार्ग बनवण्याचा सरकार विचार करत आहे. मात्र तो वेळखाऊ आणि खर्चिक आहे, असे वाटते. पूल झाला तरच सर्वसामान्यांचा त्रास वाचेल.

- सुहास टकले

..

पुलाची नितांत गरज

हिमालय पूल पुन्हा उभारण्यात यायला हवा, त्याची खूप गरज आहे. रस्ता ओलांडताना अनेकदा पुलाची गरज असते. अनेकजण ट्रेन पकडण्याच्या नादात सिग्नलकडे लक्ष देत नाही. त्यामुळे अपघात होण्याची शक्यता असते. त्यामुळे प्रवाशांच्या सुरक्षितेचा मुद्दाही विचारात घ्यायला हवा.

- दर्शना सराफ

..

गैरसोय टळावी

हिमालय पूल हा पूर्वीपासूनच मुंबईकरांच्या सेवेत होता आणि तो पडल्यानंतर अनेकजणांची गैरसोय होत आहे. हिमालय पूल परत बांधून तो लवकरात लवकर सर्वसामान्यांसाठी खुला करावा. अनेक प्रवासी या पुलाचा वापर करतात, तो पडल्यामुळे सर्वसामान्यांची गैरसोय होत आहे.

- दीपक ओवाळ

..

सामान्यांचा विचार व्हावा

शहर नियोजनामध्ये रस्ते, पूल उभारणी या गोष्टींना प्राधान्यक्रम असतो. मात्र अशा दुर्घटनेनंतर यांचा वापर करणाऱ्या मुंबईकरांना त्याबद्दल काय वाटते, ही सुविधा कशा प्रकारची असायला हवी यासंदर्भात विचारणा व्हायला हवी. सार्वजनिक वाहतूक व्यवस्थेच्या दृष्टीने हे महत्त्वाचे आहे.

- विनोद हिराबाई धनाजी