दिवाळीत 'पाऊस', आकाश कंदिल कसे लावायचे?; सामान्यांना चिंता

मुंबई: गेला-गेला म्हणताना पाऊस पुन्हा फिरून आल्यानं राज्यात दिवाळीचा उत्साह मावळल्याचं चित्र आहे. हा पाऊस आणखी काही दिवस राहणार असल्यानं दिवाळीच्या दिवसांत आकाशकंदिल, दिवे कसे लावायचे, याची चिंता घरातल्या जाणत्यांना सतावते आहे. तर, पावसात 'पाऊस' आणि भुईचक्रासारखे फटाके कसे फोडायचे, याची प्लानिंग करण्यात बच्चे कंपनी गुंतली आहे.

दिवाळी म्हणजे दिव्यांचा सण. दिवाळीची चाहूल लागताच वातावरण पालटून जातं आणि एक प्रकारचा उत्साह ओसंडून वाहू लागतो. यंदा मात्र या उत्साहावर विरजण पडले आहे. त्याला कारण बाजारातील आर्थिक मंदी नसून आकाश व्यापून राहिलेला पाऊस आहे. येत्या २८ पर्यंत पाऊस राहील असा अंदाज आहे. त्यामुळं या निरुत्साहात भर पडली आहे. अंगणात सडारांगोळी कशी काढायची? दिवे कसे लावायचे?, असे प्रश्न गृहिणींना पडले आहेत. तर, आकाश कंदिल कसे आणि कुठे टांगायचे, असा प्रश्न घरातील पुरुष मंडळींना पडला आहे. प्लास्टिकबंदीमुळं प्लास्टिकच्या कंदिलांवर मर्यादा आल्यामुळं या चिंतेत भर पडली आहे. सुट्टी असूनही खेळता येत नसल्यामुळं पावसावर नाराज असणारी बच्चे कंपनी फटाक्यांपासून दूर राहावे लागत असल्यानं अधिकच चिडली आहे.

दुकानदार अजूनही आशावादी

दिवाळीच्या आठ दिवस आधीपासूनच बाजार फुललेले दिसतात. दिवाळीच्या प्रत्येक दिवसासाठी लागणारं साहित्य बाजारात दिसतं. दुकानदारांनी ते मागवलं असलं तरी पावसामुळं म्हणावी तशी गर्दी बाजारात दिसत नाहीए. रस्त्यावरील विक्रेत्यांना पावसाचा मोठा फटका बसत आहे. त्यामुळं आधीच मंदी आणि त्यात पाऊस अशा कोंडीत दुकानदार व व्यापारी सापडले आहेत. असं असलं तरी हे चित्र बदलेल, अशी आशा विक्रेते व्यक्त करत आहेत.
वाचा: केंद्र सरकारची अधिकाऱ्यांना दिवाळी 'भेट'