अ‍ॅपशहर

हवी थेट विमानसेवा

मुंबईतून इंडोनेशियातील बालीमध्ये जाण्यासाठी थेट विमानसेवा शोधण्याची झटापट जवळपास दीड लाख लोकांनी केली... तर अमेरिकेच्या सॅनफ्रान्सिस्को, लॉस एंजेलिस या शहरांकरिताही मुंबईतून थेट विमानसेवा हवी, यासाठी सुमारे लाखभर प्रवाशांची शोधाशोध सुरू होती...

Maharashtra Times 28 Nov 2016, 6:50 am
sameer.karve@timesgroup.com
महाराष्ट्र टाइम्स.कॉम pepole want mumbai bali direct flight
हवी थेट विमानसेवा


Tweet : @sameerkarveMT

मुंबई : मुंबईतून इंडोनेशियातील बालीमध्ये जाण्यासाठी थेट विमानसेवा शोधण्याची झटापट जवळपास दीड लाख लोकांनी केली... तर अमेरिकेच्या सॅनफ्रान्सिस्को, लॉस एंजेलिस या शहरांकरिताही मुंबईतून थेट विमानसेवा हवी, यासाठी सुमारे लाखभर प्रवाशांची शोधाशोध सुरू होती... इतकी मागणी असूनही या स्थळांना मुंबईतून थेट उड्डाणेच उपलब्ध नव्हती. जगभरातील अनेक स्थळांना प्रवाशांकडून मोठ्या प्रमाणात थेट उड्डाणाची मागणी असतानाही मुंबई, दिल्लीसारख्या महानगरांतून हे रुट्स वंचितच राहिले आहेत, असे एका सर्वेक्षणातून समोर आले आहे.

स्कायस्कॅनर या सर्च इंजिनतर्फे अलिकडेच ५ कोटी प्रवाशांच्या डेटाबेसमधून एक सर्वेक्षण घेण्यात आले. त्यात बुकिंग करणारे प्रवासी कोणत्या रुटसाठी थेट विमानसेवेची विचारणा करतात, हे पाहिले गेले. त्यात बाली, सॅन फ्रान्सिस्को, लॉस एंजेलिसची मुंबईतून शोधाशोध सुरू होती. त्याचप्रमाणे दिल्लीहून न्यूझीलंडच्या ऑकलंडसाठी थेट विमानसेवा शोधणारे १.२० लाखांहून अधिक लोक आढळले. याच संस्थेने नाताळातील सहलीसाठी लोकप्रिय ठिकाणांविषयी सर्वेक्षण केले होते. त्यातही दिल्लीकरांमध्ये ऑकलंड हे वरच्या स्थानावर आढळले होते.

मुंबईकरांमध्ये अमेरिकेच्या वेस्टकोस्टला थेट विमानसेवेने जाण्यासाठी मोठ्या प्रमाणात मागणी होती. युरोपातील अनेक स्थळे आता भारताशी चांगल्या प्रकारे जोडली गेली असली, तरीही दिल्लीतून अॅथेन्स आणि बार्सिलोनाला जाण्यासाठी थेट उड्डाण उपलब्ध नव्हते. त्यासाठी ५० हजार जणांनी शोध घेतला होता. मुंबईतून जोहान्सबर्ग (८३ हजार), सिडनी (८२ हजार), मेलबर्न (८१ हजार), माले (७९ हजार) व दार-ए-सलाम (७८ हजार) या शहरांसाठीही थेट उड्डाणसेवेची शोधाशोध प्रवाशांनी केली होती.

टूर व्यावसायिक राजेश रातेरिया यांनी सांगितले की, इंडोनेशियातील बाली हे ठिकाण परिषदा, मेडिकल-कॉन्फरन्स, पर्यटन, लग्नसमारंभ अशा विविध कारणांसाठी सध्या लोकप्रिय आहे. तेव्हा तेथे मागणी मोठी असते. एअर इंडिया, जेट यांनीही काही थेट उड्डाणे मुंबईऐवजी दिल्लीहून केली आहेत. इतकी मोठी मागणी असल्याचे स्पष्ट झाले असेल, तर एअर इंडिया, जेट अशा कंपन्यांना लांब पल्ल्याची थेट उड्डाणे सुरू करण्यासाठी सरकारनेही पाठबळ द्यायला हवे. विमान कंपन्यांनीही अशा सर्वेक्षणावरून व्यवहार्यता तपासणी करायला हवी.

इंधन व्यवहार्यता महत्त्वाची

हवाई वाहतूकतज्ज्ञ विंगकमांडर (निवृत्त) शशिकांत कोप्पीकर यांनी सांगितले की, थेट उड्डाणांना इंधनटाकी पूर्ण भरायची असल्याने सर्वच्या सर्व प्रवासी नेता येत नाहीत. शिवाय ७७७ सारखी लांब पल्ल्यासाठी वापरली जाणारी मोठी विमाने दोन शहरांमध्ये कमी अंतरासाठी फिरविणे इंधन तसेच तांत्रिक व्यवहार्यतेच्या दृष्टीने अयोग्य ठरते. त्यामुळेच नटक्रॅकर म्हणजे अडकित्त्यासारखे रुटप्लॅनिंग सयुक्तिक ठरते. जसे जाताना विमान मुंबईहून सॅनफ्रान्सिस्कोला जाईल व येताना ते दिल्लीत येईल. असे केल्यास थेट उड्डाणे व्यवहार्य ठरतील. बालीसारख्या ठिकाणाचा एअर इंडियाने नक्कीच विचार करावा. आसनसंख्या, इंधन व सामग्रीचा वापर या सर्वांचा अभ्यास निश्चितच करावा लागतो.

महत्वाचे लेख

Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.
ताज्या बातम्यांसह अपडेट राहण्यासाठी लाइक करा Maharashtra Times फेसबुकपेज