आजपासून तासिकाबदल

म. टा. प्रतिनिधी, मुंबई

राज्य शिक्षण विभागाने काही दिवसांपूर्वी पहिली ते दहावीच्या विद्यार्थ्यांसाठी नव्या तासिकांची घोषणा केली होती. या नव्या निर्णयानुसार आता शाळांना आठवड्यासाठी ४५ ऐवजी ४८ तासिका घ्यावा लागणार असून या निर्णयाची अंमलबजावणी दिवाळी सुट्टीनंतर द्वितीय सत्रात करण्याची सूचना शिक्षण विभागाने शनिवारी शाळांना केली आहे. त्यामुळे सोमवारपासून मुंबईत सुरू होणाऱ्या शाळांना या नियमांची अंमलबजावणी करावी लागणार असून या नव्या वेळापत्रकानुसार विद्यार्थ्यांचे स्वागत होणार आहे.

राज्यातील पहिली ते दहावीच्या तासिकांबाबत २८ एप्रिल रोजी शिक्षण विभागाने परिपत्रक काढले होते. या परिपत्रकात कला आणि क्रीडा शिक्षकांचे तास कमी केल्याने संघटनांनी २८ एप्रिलच्या परिपत्रकाला विरोध करीत ते मागे घेण्यासाठी आग्रही भूमिका घेतली. शिक्षकांच्या या आक्रमक पवित्र्यानंतर शिक्षण विभागाने ११ ऑक्टोबर रोजी तासिकांच्या संदर्भात नवीन परिपत्रक जाहीर केले. या नव्या निर्णयानुसार शाळांना आठवड्याभरासाठी ४५ ऐवजी ४८ तासिका घ्यावा लागणार आहेत. मुंबईतील बहुतांश शाळा सोमवारपासून सुरू होत आहेत. त्यामुळे नवीन सत्रात या नव्या तासिकांप्रमाणेच शाळांचे वेळापत्रक असावे, अशी सूचना शिक्षण विभागाने शाळांना केली आहे. काही शाळा १ आणि २ नोव्हेंबरला सुरू होत असून या शाळांनी शिक्षकांना त्यानुसार वेळापत्रक आखण्याची सूचना केली आहे.

या नव्या परिपत्रकानुसार कला आणि आरोग्य व शारीरिक शिक्षण या विषयांना तासिकांमध्ये स्थान देण्यात आले आहे. यासाठी विद्यार्थ्यांना खेळ आणि कलेसाठी अशा मिळून दोन तासिका वाढवून दिल्या आहेत. जुन्या निर्णयानुसार एका वर्गाचा आठवड्याचा एकूण वेळ २६ तास ४५ मिनिटे इतका होता. आता हा वेळ २७ तास १० मिनिटे इतका होणार आहे. तर शुक्रवारी ८ तासिकांऐवजी आता ९ तासिका होणार आहेत. पहिली तासिका ही ३५ मिनिटांची आणि पुढील सर्व तासिका या ३० मिनिटांच्या असणार आहेत. शनिवारी ५ ऐवजी ७ तासिका घेण्यात येणार आहेत. शुक्रवार आणि शनिवारच्या तासिका या कला आणि आरोग्य व शारीरिक शिक्षण या विषयांसाठी देण्याची सूचना या परिपत्रकात करण्यात आली आहे.