उदया मध्यरात्रीनंतर सात तास पेट्रोल पंप बंद

मटा ऑनलाइन वृत्त । मुंबई

पेट्रोल पंपांसह सर्व सरकारी कार्यालयात पाचशे आणि हजारच्या जुन्या नोटा स्वीकारण्याचा सरकारच्या अध्यादेशाची मुदत गुरुवारी ११ नोव्हेंबरच्या मध्यरात्री १२ वाजता संपणार आहे. त्या पार्श्वभूमीवर ग्राहकांशी वादावादी नको म्हणून पेट्रोल पंप असोसिएशनने मुंबईतील पेट्रोलपंप मध्यरात्रीपासून सकाळी सात वाजेपर्यंत बंद ठेवण्याचा निर्णय घेतला आहे.

सर्व सरकारी कार्यालयांना पाचशे आणि हजाराच्या जुन्या नोटा स्वीकारण्याची देण्यात आलेली मुदत ११ नोव्हेंबर रोजी मध्यरात्री संपत आहे. त्यामुळे रात्री बारानंतर ग्राहकांकडून नव्या नोटा स्वीकारताना वादावादी होऊ नये यासाठी मध्यरात्री १२ नंतर सात तास पेट्रोल पंप बंद ठेवण्याचा निर्णय घेतल्याचे पेट्रोल पंप असोसिशनचे रवी शिंदे यांनी सांगितले.

रात्री बहुतांश पेट्रोल पंपांवर कामगार वर्गच असल्याने कायदा सुव्यवस्थेची परिस्थिती निर्माण होऊ नये म्हणून हा निर्णय घेण्यात आला आहे. १२ नोव्हेंबर रोजी सकाळी सात वाजल्यापासून पेट्रोल पंप नेहमी प्रमाणे सुरू राहणार असून नव्या नोटा स्वीकारल्या जातील असेही त्यांनी सांगितले.