पंतप्रधानांनी ठेवली हल्ल्यावर नजर

Aman.Sharma@timesgroup.com

ईटी वृत्त, नवी दिल्ली

भारतीय सैन्याने बुधवारी रात्री पाकव्याप्त काश्मीरमध्ये केलेल्या सर्जिकल ऑपरेशनचा संपूर्ण मागोवा पंतप्रधानांनी घेतला होता, अशी माहिती सैन्याच्या वरिष्ठ अधिकाऱ्याने दिली आहे.

दहशतवाद्यांनी भारतात प्रवेश करेपर्यंत कारवाईसाठी वाट पाहण्याचे धोरण इतकी वर्षे भारताकडून राबवले गेले. बुधवारी केलेल्या या सर्जिकल ऑपरेशनमुळे या धोरणापासून भारताने फारकत घेतल्याचे स्पष्ट झाले आहे. यामुळे भावी काळात पाकिस्तानच्या भूमीतून होणाऱ्या घुसखोरीला आळा बसण्यासाठी परिस्थिती निर्माण झाली आहे, असे एक अधिकाऱ्याने नाव न छापण्याच्या अटीवर सांगितले.

उरी हल्ल्याच्या पार्श्वभूमीवर सरकारने नागरिकांच्या भावना योग्य प्रकारे जाणून घेतल्या, जनतेमध्ये असलेला राग ओळखला. उरीचा हल्ला हा निर्भया बलात्कार प्रकरणाइतकाच गंभीर होता. सिंधु नदीच्या पाण्याच्या वाटपाचाही सरकारने पुनर्विचार केला तसेच सर्वाधिक उपकृत देश हा पाकिस्तानला दिलेला दर्जा याचाही पुनर्विचार झाला, याकडे सैन्यातील अधिकाऱ्यांनी लक्ष वेधले.

यापूर्वी घुसखोरीचे १७ प्रयत्न झाले होते. मात्र उरीतून भारतात शिरण्यात दहशतवादी यशस्वी झाले. उरीची पुनरावृत्ती झाली असती तर ते देशासाठी महागात पडले असते. त्यामुळे दहशतवाद्यांच्या तळांना शोधून काढून त्यांच्यावर अत्यंत सुनियोजित पद्धतीने हल्ला करण्यात आला, असे एक अधिकारी म्हणाला.

या हल्ल्यामध्ये पाकिस्तानचे दोन सैनिक मारले गेले. यासाठी पाकिस्तानने भारताविरुद्ध मोठा कांगावा केला आहे. हे सैनिक दहशतवाद्यांच्या तळांचे संरक्षण करताना मारले गेल्याचा दावा भारताने केला आहे. दहशतवादी तळांनजीक पाकिस्तानी सैनिक काय करत होते याचे पाकिस्तानने उत्तर द्यायला हवे, असेही हे सैनिक म्हणाले. तसाही हा हल्ला पाकव्याप्त काश्मीरमध्ये करण्यात आला. हा भूभाग भारत आपलाच असल्याचे मानत आल्याने पाकिस्तानला कांगावा करण्याचा कोणताही अधिकार नाही, याकडे अधिकाऱ्यांनी लक्ष वेधले आहे.