पंतप्रधान मोदींच्या हस्ते समृद्धी महामार्गाचं लोकार्पण, नागपूर ते शिर्डी आता फक्त ५ तासांत!

मुंबई : ज्याची संपूर्ण राज्याला उत्सुकता लागून राहिलेली होती त्या बहुप्रतिक्षित नागपूर- मुंबई द्रुतगती समृद्धी महामार्गाच्या नागपूर ते शिर्डी या पहिल्या ५२० किमी टप्प्याचे लोकार्पण पंतप्रधान नरेंद्र मोदी यांच्या हस्ते ११ डिसेंबर रोजी होणार आहे. हा महामार्ग खुला झाल्यानंतर नागपूर ते शिर्डी अंतर १० तासांऐवजी ५ तासांत कापता येईल. यापूर्वी अनेकदा समृद्धी महामार्गाच्या उद्घाटनाच्या तारखा ठरुनही विविध कारणांमुळे लोकार्पण सोहळा लांबणीवर पडत होता. मात्र डिसेंबरच्या ११ तारखेचा मुहूर्त अंतिम झाला असल्याची माहिती एमएसआरडीसीचे व्यवस्थापकीय संचालक राधेश्याम मोपलवार यांनी दिली आहे.

या कार्यक्रमाला पंतप्रधान मोदी यांच्यासह राज्याचे मुख्यमंत्री एकनाथ शिंदे, उपमुख्यमंत्री देवेंद्र फडणवीस, केंद्रीय मंत्री नितीन गडकरी तसेच विदर्भातील आमदार खासदार उपस्थित राहतील. महामार्गावरील वायफड नाक्याजवळ लोकार्पण सोहळ्यासाठीचं सभास्थळ उभारण्याचे काम सुरू झाले आहे. उद्घाटनानंतर पंतप्रधान मोदी काही किलोमीटरचा प्रवास करतील तसेच छोटेखानी सभेला संबोधितही करतील. या सोहळ्याच्या नियोजनाची जबाबदारी मुंबईच्या एका कंपनीकडे देण्यात आली आहे.

खरं तर १ मे म्हणजेच महाराष्ट्र दिनी तत्कालीन मुख्यमंत्री उद्धव ठाकरे यांच्या हस्ते समृद्धी महामार्गाचं उद्घाटन होणार होतं. मात्र तो मुहूर्त हुकला. आता सत्तांतरानंतर पंतप्रधानांच्या हस्ते या हायवेचं भव्य उद्घाटन होतंय. समृद्धी महामार्ग हा महाराष्ट्राच्या विकासाचा आणि प्रगतीचा साक्षीदार ठरेल, असा विश्वास मुख्यमंत्री एकनाथ शिंदे यांच्यासह उपमु्ख्यमंत्री फडणवीस यांनी व्यक्त केला.

कार्यक्रमाची रुपरेषा....

• ११ डिसेंबरला सकाळी ११ वाजता पंतप्रधान मोदींचं नागपूर विमानतळावर आगमन
• नागपूर विमानतळ मेट्रोच्या स्थानकावर त्यांच्या हस्ते मेट्रो मार्गिकेचं लोकार्पण
• त्यानंतर मोदी समृद्धी महामार्गाच्या उद्घाटनासाठी रवाना होणार
• गडकरींचा महत्त्वकांक्षी प्रोजेक्ट फुटाळा तलावाचंही मोदींच्या हस्ते उद्घाटनाची शक्यता
• पण कार्यक्रम पत्रिकेत या सोहळ्याचा समावेश नसल्याने साशंकता

'समृद्धी'ची वैशिष्ट्ये

• मुंबई ते नागपूर ८ तासांत अंतर पार करण्याचं उदिष्ट
• ७०१ किमी लांबीचा महामार्ग
• महामार्गासाठी ५५ हजार कोटी रुपये खर्च
• १० जिल्ह्यांमधील ३९० गावांना जोडणारा महामार्ग