म. टा. खास प्रतिनिधी, मुंबई
पंजाब अॅण्ड महाराष्ट्र सहकारी बँक (पीएमसी) गैरव्यवहार प्रकरणी आर्थिक गुन्हे शाखेने तपासाला वेग आला असून शनिवारी बँकेचे अध्यक्ष वारियामसिंग कर्तारसिंग यांना अटक करण्यात आली. या कारवाईमुळे या प्रकरणातील अटक आरोपींची संख्या चारवर पोहोचली आहे. चार हजार ३३५ कोटींच्या या घोटाळ्याप्रकरणी दहापेक्षा अधिक आरोपींवर गुन्हा दाखल करण्यात आला आहे.
पंजाब अॅण्ड महाराष्ट्र सहकारी बँक गैरव्यवहार प्रकरणी आर्थिक गुन्हे शाखेत ३० सप्टेंबर रोजी गुन्हा दाखल करण्यात आला. भारतीय रिझर्व्ह बँकेच्या आदेशावरून एचडीआयएल आणि बँकेच्या पदाधिकाऱ्यांविरुद्ध हा गुन्हा दाखल करण्यात आला होता. यासाठी स्थापन करण्यात आलेल्या विशेष तपास पथकाने सर्वात आधी याप्रकरणात एचडीआयएल कंपनीचे कार्यकारी अध्यक्ष राकेश वाधवान आणि व्यवस्थापकीय संचालक सारंग वाधवान या दोघांना अटक केली. त्यानंतर पीएमसीचे निलंबित व्यवस्थापकीय संचालक जॉय थॉमस याला पकडण्यात आले. आर्थिक गुन्हे शाखेची कारवाई पाहून अध्यक्ष वारियामसिंग कर्तारसिंग यांनीही आपली तपासामध्ये सहकार्य करण्याची तयारी असल्याचे पत्र पोलिसांना दिले. यानंतर शनिवारी सायंकाळी त्यांना माहीम परिसरातून अटक करण्यात आली.
थॉमस पोलिस कोठडीत
पीएमसी बँकेचे निलंबित व्यवस्थापकीय संचालक जॉय थॉमस यांना शुक्रवारी अटक केल्यानंतर शनिवारी अतिरिक्त मुख्य न्यायदंडाधिकारी एस. जी. शेख यांच्यापुढे हजर करण्यात आले. थॉमस कोट्यवधीच्या घोटाळ्याच्या कटात सहभागी असल्याने चौकशीसाठी त्यांच्या कोठडीची गरज असल्याचे पोलिसांनी सांगितले. तर थॉमस यांना बळीचा बकरा बनवले जात असल्याचा युक्तिवाद थॉमस यांच्या वकिलाने केला. मात्र न्यायालयाने पोलिसांची मागणी मान्य करत थॉमस याला १७ ऑक्टोबरपर्यंत पोलिस कोठडी सुनावली आहे.