पेट्रोलपंपवर पोलिसाला मारहाण

Suraj.sawant@timesgroup.com

मुंबई : शहरातील पेट्रोलपंपावर भविष्यातील ई-चलन पद्धतीने दंडात्मक रक्कम आण‌ि वाहनांची माहिती गोळा करणा‍ऱ्या वाहतूक पोलिसाला एका दुचाकीस्वाराने मारहाण केल्याची घटना खार येथे उघडकीस आली आहे. या मारहाणीत पोलिस शिपाई गंभीर जखमी झाला असून त्याच्यावर लिलावती रुग्णालयात उपचार सुरू आहेत. याप्रकरणी पोलिसानी मालवणीतून एका संशयिताला ताब्यात घेतले आहे.

मुंबई शहरात नियमभंग करणाऱ्या चालकांवर कारवाई करताना प्रचंड वेळ जातो. त्यामुळेच शहरात ‘ई-चलन’ उपक्रम मुंबईत सुरू केला जाणार आहे. त्या पार्श्वभूमीवर वाहतूक पोलिसांनी पेट्रोलपंपवर पेट्रोल भरण्यासाठी येणा‍ऱ्या चालकाचे नाव, पत्ता, मोबाइल नंबर आण‌ि वाहनांचा नंबर नोंदवण्यास वाहतूक पोलिसांनी सुरुवात केली आहे.

एसव्ही रोडवरील जुना खार मार्केटसमोरील पेट्रोलपंपवर मंगळवारी वांद्रे डिव्हिजनचे विलास विठोबा शिंदे पेट्रोल भरण्यासाठी येणा‍ऱ्यांची माहिती जमा करत होते. त्यावेळी एका दुचाकीस्वाराला माहिती विचारली असता चालक आण‌ि शिंदेंमध्ये शाब्दिक वाद झाला. याच वादातून राग अनावर झालेल्या दुचाकीस्वाराने शिंदे यांना पेट्रोलपंपवरील लाकडी बांबूने मारहाण करत तेथून पळ काढला. या मारहाणीत शिंदे यांच्या डोक्याला गंभीर दुखापत झाल्याची माहिती पोलिस नियंत्रण कक्षाला देण्यात आली. त्यानुसार खार पोलिसांनी तातडीने घटनास्थळी धाव घेत जखमी शिंदे यांना लिलावती रुग्णालयात दाखल केले. पोलिसांनी मारहाण करणा‍ऱ्या दुचाकीस्वाराविरोधात खार पोलिस ठाण्यात गुन्हा नोंदवला आहे.