देवळात जायच्या सवयीने 'तो' तुरुंगात पोहोचला!

मुंबई

दादर स्टेशनवरून पोर्टेबल डेटा टर्मिनल चोरणारा एक वयस्कर आणि देवभोळा चोर त्याच्या एका चांगल्या सवयीमुळे पोलिसांच्या जाळ्यात सापडला आहे. ठरावीक दिवशी विशिष्ट देवळात जाण्याची सवय त्याला तुरुंगात घेऊन गेली. मरीन लाइन्स इथल्या हनुमान मंदिरातच रेल्वे सुरक्षा बलाच्या पाच जणांच्या पथकाने त्याला अटक केली. अशोक पवार (६०) असं या श्रद्धाळू चोराचं नाव आहे.

१७ मार्चला मध्य रेल्वेच्या दादर स्टेशनावरून अशोक पवारने पोर्टेबल डेटा टर्मिनल मशीन चोरलं होतं. कार्ड स्वाइप करण्यासाठी आणि बारकोड्स वाचण्यासाठी हे मशीन वापरलं जातं. स्वाभाविकच, त्यात बराच महत्त्वाचा डेटा होता. त्यामुळे या चोरीची माहिती पोलिसांना देण्यात आली आणि लगेचच तपास सुरू झाला. या यंत्रातील सिम कार्डच्या आधारे, ते कुठल्या परिसरात आहे हे पोलिसांनी शोधलं. तेव्हा चोरबाजारातील एका रद्दीवाल्याकडे ते सापडलं. सुमारे २० हजार रुपये किंमतीचं मशीन चोराने त्याला अवघ्या ३० रुपयांत विकलं होतं.

त्यानंतर, त्या रद्दीवाल्याच्या मदतीने, दादर स्टेशनातील सीसीटीव्ही फुटेजवरून पोलिसांना अशोक पवारची ओळख पटली. त्याला ऑफिसात शिरताना सीसीटीव्हीनं टिपलं होतं. त्याच्याबाबतची माहिती गोळा करताना, तो खूप धार्मिक असल्याचं कळलं. दादर स्टेशनजवळच्या एका झोपडीत राहणारा अशोक पवार दर सोमवारी सायन कोळीवाड्यातील एका गुरुद्वारामध्ये जातो, शुक्रवारी माहीम दर्ग्यात जाऊन दर्शन घेतो आणि शनिवारी मरीन लाइन्सच्या हनुमान मंदिरात जातो, अशी आश्चर्यकारक माहिती त्याच्या ओळखीच्या व्यक्तींनी पोलिसांना दिली. त्या आधारेच पोलिसांनी सापळा रचला आणि शनिवारी रात्री त्याला अटक केली.

दरम्यान, अशोक पवारकडून पोर्टेबल डेटा टर्मिनल विकत घेणाऱ्या अझीझवरही, रेल्वेची मालमत्ता अवैधरीत्या बाळगल्याबद्दल गुन्हा दाखल करण्यात आला आहे.