म. टा. खास प्रतिनिधी, मुंबई
दादरच्या शिंदेवाडी परिसरात शनिवारी पोलिसाच्या आत्महत्येचे थरारनाट्य रंगले. आत्महत्या करण्यासाठी इमारतीच्या छतावर चढलेल्या पोलिसाला चार तासांच्या प्रयत्नांनंतर आत्महत्येपासून परावृत्त करण्यास यश आले. घरगुती कारणांना कंटाळून त्याने हा आत्महत्येचा प्रयत्न केल्याचे म्हटले जात आहे. मात्र यामागील नेमक्या कारणाचा भोईवाडा पोलिस शोध घेत आहेत.
भोईवाडा पोलिसांनी शिंदेवाडी नाका परिसरात नाकाबंदी लावली होती. याच वेळी येथूनच काही अंतरावर एका इमारतीच्या छतावरून एक व्यक्ती आत्महत्या करीत असल्याची माहिती या ठिकाणी नेमणुकीला असलेले सहायक निरीक्षक राहुल लोखंडे यांना मिळाली. पोलिसांचे पथक या ठिकाणी पोहचले. चौथ्या मजल्यावरून एक तरुण उडी मारण्याच्या बेतात असल्याचे त्यांनी पाहिले. पोलिसांनी अग्निशमन दल आणि रुग्णवाहिका यांना पाचारण केले. सहायक पोलिस आयुक्त संगीता पाटील आणि वरिष्ठ पोलिस निरीक्षक विनोद कांबळे यांनाही लोखंडे यांनी कळविले. लोखंडे यांनी आत्महत्येचा प्रयत्न करणाऱ्या तरुणाशी संवाद सुरूच ठेवला. मात्र, तो ऐकण्याच्या मनस्थितीत नव्हता. तो चौथ्या मजल्यावरून उडी मारेल या शक्यतेने इमारतीच्या आजूबाजूला जाळ्या आणि गाद्या टाकण्यात आल्या. जवळपास तीन चार तासांच्या प्रयत्नानंतर त्याला आत्महत्येपासून परावृत्त करण्यात यश आले. हा तरुण ताडदेव सशस्त्र दलात या पोलिस नेमणुकीला असून घरगुती कलहातून त्याने हा प्रयत्न केल्याची प्राथमिक माहिती पोलिसांना मिळाली.