नाट्य संमेलनात राजकीय फलकबाजी

Chintamani.Patki@timesgroup.com
Twitter : @ChintamanipMT

प्रियदर्शनी इंदिरा गांधी क्रीडा संकुल, मुलुंड

येथे होत असलेल्या ९८ व्या अखिल भारतीय मराठी नाट्य संमेलनासाठी मुलुंड नगरी सजली असली तरी सजावटीमध्ये सर्वात अधिक वाटा आहे तो राजकीय फलकबाजीचा. एखाद्या सभास्थळी असते तशी फलकबाजी नाट्य नगरी असलेल्या मुलुंडमध्ये पहायला मिळत आहे. सर्वसमावेशक नाट्य संमेलनामुळे सर्वपक्षीय नेत्यांच्या फलकांनी परिसर व्यापला आहे. या फलकांमुळे जणू पुढील वर्षीच्या निवडणुकीची रंगीत तालीम सुरू झाली आहे.

मुलुंड येथील प्रियदर्शनी इंदिरा गांधी क्रीडा संकुलाच्या आवारात आयोजित ९८ नाट्य संमेलनात सहभागी होणाऱ्या नेत्यांचे आणि कलावंतांचे स्वागत करण्यासाठी चढाओढ लागली आहे. संमेलनाच्या उद्घाटन सोहळ्यात ज्येष्ठ नेते शरद पवार व महाराष्ट्र नवनिर्माण सेनेचे अध्यक्ष राज ठाकरे तसेच समारोप सत्रात माजी केंद्रीय गृहमंत्री सुशीलकुमार शिंदे व शिवसेनेचे पक्षप्रमुख उद्धव ठाकरे यांची उपस्थिती असल्याने त्यांच्या स्वागताचे अनेक फलक परिसरात लावण्यात आल्याचे दिसून येत आहे. संमेलनाचे स्वागताध्यक्ष विनोद तावडे तसेच स्वागत समितीचे उपाध्यक्ष किरीट सोमय्या यांचेही फलक येथे लागले आहेत. संमेलनाच्या नियोजनामध्ये राजकीय कार्यकर्त्यांनी पुढाकार घेतल्याने आपआपल्या नेत्याचे स्वागत करण्यासाठी कार्यकर्त्यांनी कंबर कसली आहे.

नाट्य संमेलन स्थळाकडे जाणाऱ्या काही रस्त्यांवर शरद पवार यांचे अनेक फलक झळकले आहेत. त्या खालोखाल राज यांचे फलक लक्ष वेधून घेत आहेत. उद्धव ठाकरे यांचेही अनेक फलक दिसून येत आहेत. काही फलकांवर सर्व नेत्यांची एकत्रित छायाचित्र झळकल्याने पक्षविरहित चित्र नागरिकांना पाहायला मिळत आहे. विशेष म्हणजे नाट्यसंमेलनाध्यक्ष कीर्ती शिलेदार यांच्या छायाचित्राचा एकही फलक संकुलाच्या बाहेरील परिसरात लागलेला नसल्याने उत्सवमूर्तींऐवजी राजकीय उत्सवाला उधाण आल्याचे दिसते. काही फलकांवर शिलेदार यांचे छायाचित्र आहे, मात्र इतरांच्या तुलनेत उत्सवमूर्तींच्या छायाचित्राचा आकार कमी आहे.

राजकीय फलकबाजी आणि फलकांवरील राजकीय मंडळींच्या भाऊगर्दीत नाट्य संमेलन, नाट्यसंमेलनाध्यक्ष, नाटक, कलावंत हरवू नयेत, अशी अपेक्षा रंगकर्मी आणि रसिकांकडून व्यक्त होत आहे.

संमेलननगरी फुलली !

प्रियदर्शनी इंदिरा गांधी क्रीडा संकुलाचा आवार विविध प्रकारच्या सजावटीने फुलून गेला आहे. प्रवेशद्वाराजवळ स्वागतासाठी लावण्यात आलेली कमान लक्ष वेधून घेत आहे. रंगदेवतेचा मोठा फलक येथे असून पहिले नमन तिथे होत आहे. कमानीच्या दोन्ही बाजूंना नाटकांचे नाव असलेल्या पेट्या आहेत तर आतमध्ये पताका झळकत आहेत. नाट्यनगरीकडे येणाऱ्या लोकांचे प्रमाण वाढत असले तरी असह्य उकाड्याने लोक हैराण झाले आहेत.