प्रियांका गांधी तैमूर, पवार शकुनीमामा: पूनम महाजन

मुंबई:

काँग्रेसच्या नेत्या प्रियांका गांधी यांचे इतके फोटो व्हायरल झाले आहेत की त्या पुढच्या तैमूर अली खान आहेत तर, प्रत्येक प्रकरणात नाक खुपसणारे शरद पवार हे शकुनीमामा आहेत, अशी जोरदार टीका भारतीय जनता युवा मोर्चाच्या अध्यक्ष व खासदार पूनम महाजन यांनी केली आहे.

त्या घाटकोपर येथील सभेत बोलत होत्या. मुख्यमंत्री चषक क्रीडा स्पर्धेच्या बक्षीस वितरण समारंभात प्रमुख अतिथी म्हणून पूनम महाजन यांना बोलावण्यात आलं होतं. यावेळी बोलताना महाजन यांनी विरोधी पक्षांवर निशाणा साधला. विरोधी पक्षांच्या देशव्यापी 'महागठबंधन'ला (महाआघाडी) पूनम महाजन यांनी महा'ठग'बंधन म्हटलं आहे. महाभारतातील शकुनीमामा जसे प्रत्येक प्रकरण तोंड घालून भांडण लावायचे तेच काम शरद पवार करतात, अशी टीका पूनम महाजन यांनी केली.

त्या एवढ्यावरच थांबल्या नाहीत तर काँग्रेस अध्यक्ष राहुल गांधी यांचं त्यांनी 'राफुल' असं बारसंही केलं. 'राहुल गांधींना स्वत:ला काहीच कळत नाही. त्यांची आई सांगते तेवढंच ते ऐकतात. त्यांचं नाव राहुल नाही तर रा'फूल' असायला हवं. या भाषणात ममतादीदींचा उल्लेख त्यांनी दहशतवादी गुंडा असा केला.