फॅशन डिझायनरला अश्लील व्हिडीओ कॉल

म. टा. खास प्रतिनिधी, मुंबई

कपडे शिवायला येणाऱ्या फॅशन डिझायनर तरुणीला अश्लील व्हिडीओ कॉल करणाऱ्या फैय्याज शेख या लेडीज टेलरला गुन्हे शाखेच्या पथकाने नुकतीच अटक केली. व्हिडीओ कॉलला प्रतिसाद न दिल्यास चेहऱ्यावर ॲसिड फेकण्याची धमकीही शेख याने या तरुणीला दिली होती.

२२ वर्षांची ही तरुणी मलबार हिल येथे राहणारी असून, तिची आईही फॅशन डिझायनर आहे. कपड्याची नवी डिझाइन तयार केली की या दोघी त्यानुसार कपडे शिवून घेण्यासाठी फैयाज शेख याच्याकडे ऑर्डर देत. या दोघी अनेक वर्षांपासून फैयाजला ओळखत होत्या. मात्र, ९ ऑक्टोबर रोजी रात्री फैयाजने दुसऱ्याच्या मोबाइलवरून या तरुणीला व्हिडीओ कॉल केला. अंगावरचे सर्व कपडे काढून तो या तरुणीला व्हिडीओतून दाखवू लागला. यावेळी त्याने स्वतःचा चेहरा लपविला होता. तरुणी कॉल कट करू लागल्याने त्याने चेहऱ्यावर ॲसिड फेकून चेहरा विद्रूप करण्याची धमकी दिली. यामुळे घाबरलेल्या तरुणीने मलबार हिल पोलिस ठाण्यात तक्रार केली.

प्रकरण गंभीर असल्याने गुन्हे शाखा युनिट दोनच्या पथकानेही तपास सुरू केला. अनोळखी नंबरवरून कॉल आल्याने तो नेमका कोणी केला हे समजत नव्हते. कॉलची माहिती काढली असता तो मोबाइल दहिसरमधील एका महिलेचा असल्याचे समोर आले. असा कोणताच कॉल आपण केला नसल्याची माहिती तिने दिली. मात्र, आपल्या एका मित्राने मोबाइल काही वेळेसाठी घेतला होता, असे तिने सांगताच पोलिसांनी त्या मित्राची माहिती तिच्याकडून घेतली.

फैयाजला पकडण्यासाठी पोलिसांनी या महिलेचीच मदत घेतली. फैयाजला वरळी सीफेस येथील आरे डेअरीजवळ या महिलेने भेटायला बोलाविले आणि तो येताच सापळा रचून बसलेल्या पोलिसांनी त्याला पकडले.