विविध परीक्षांचे संभाव्य वेळापत्रक

म. टा प्रतिनिधी, मुंबई

महाराष्ट्र राज्य परीक्षा परिषदेमार्फत घेण्यात येणाऱ्या विविध परीक्षांचे संभाव्य वेळापत्रक बुधवारी जाहीर करण्यात आले. सन २०१८-१९ या शैक्षणिक वर्षात इयत्ता पाचवी आणि आठवीची शिष्यवृत्ती परीक्षा १७ फेब्रुवारी २०१९ रोजी रोजी घेण्यात येणार आहे; तर शिक्षक पात्रता परीक्षा म्हणजेच 'टीईटी' ८ जुलै रोजी घेण्यात येणार आहे.

राज्य परीक्षा परिषदेकडून दरवर्षी शालेय विद्यार्थ्यासाठी शिष्यवृत्ती परीक्षा घेण्यात येते. यापूर्वी इयत्ता चौथी, सातवीसाठी घेण्यात येणारी शिष्यवृत्ती परीक्षा आता पाचवी आणि आठवीसाठी घेण्यात येते. या परीक्षेची जाहिरात साधारण सप्टेंबर महिन्यात काढण्यात येणार असून, परीक्षा फेब्रुवारीमध्ये होणार आहे. राष्ट्रीय मिलिटरी कॉलेजमध्ये प्रवेशासाठी होणारी परीक्षा १, २ जूनला घेण्यात येणार आहे. डीटीएल आणि डीएलईडी ही परीक्षा १ जून ते १० जून या कालावधीत घेण्यात येणार आहे. टायपिंग व शॉर्ट हॅन्ड परीक्षा ११ ते १५ जून दरम्यान होणार आहे. परिषदेकडून घेण्यात येणाऱ्या इंग्रजी टायपिंग परीक्षा २५ ते ३० जून या कालावधीत तर मराठी टायपिंग आणि हिंदी टायपिंगची परीक्षा ३ ते ७ जुलै दरम्यान होईल. सरकारी संगणक टंकलेखन विशेष कौशल्य परीक्षा १२ जुलै रोजी होणार आहे. राष्ट्रीय प्रज्ञाशोध परीक्षा ४ नोव्हेंबर किंवा ११ नोव्हेंबर रोजी होईल, असे परिषदेचे आयुक्त सुखदेव डेरे यांनी प्रसिद्ध केलेल्या पत्रकात म्हटले आहे.

आर्थिक दुर्बल घटकातील विद्यार्थ्यांसाठी राष्ट्रीय शिष्यवृत्ती योजना परीक्षा २ ते ९ डिसेंबर दरम्यान होईल. शॉर्ट हॅन्ड परीक्षा १० ते १४ डिसेंबर २०१८ दरम्यान होणार असून, त्यानंतर जानेवारी फेब्रुवारी महिन्यात पुन्हा एकदा मराठी, इंग्रजी व हिंदी टायपिंगची परीक्षा होईल. संगणक विशेष कौशल्य परीक्षा २३ जानेवारी २०१९, शासकीय टंकलेखन स्पर्धा ५ फेब्रुवारी रोजी हेणार आहे. मात्र, हे वेळापत्रक संभाव्य असून यामध्ये बदलही होऊ शकतो, असेही परिषदेकडून सांगण्यात आले.