म. टा. विशेष प्रतिनिधी, मुंबई
भाजपने मुंबई महापालिकेतील पक्षाची कार्यकारिणी जाहीर करून विरोधी पक्षनेतेपदासाठी प्रभाकर शिंदे यांच्या नावाची शिफारस केली आहे. मात्र पक्षात विरोधी पक्षनेते व गटनेते पद अशी दोन पदे निर्माण करून संभ्रम वाढवला आहे. या नेमणुकींचे पत्र भाजपतर्फे महापौर किशोरी पेडणेकर यांना पाठवण्यात आले असून शिंदे यांच्या नावाची सभागृहात घोषणा करण्याची विनंती केली आहे. या घडामोडींनंतरही विरोधी पक्षनेतेपदासाठीचा भाजपचा मार्ग अजूनही खडतरच आहे.
भाजपचे मुंबई अध्यक्ष मंगलप्रभात लोढा यांनी गुरुवारी मुंबई महापालिकेची कार्यकारिणी जाहीर केली. महापालिकेत पक्षाचा गटनेता, उपनेता, प्रतोद अशी कार्यकारिणी असते. गटनेता हा पक्षाचा प्रमुख असल्यामुळे त्याची विरोधी पक्षनेतेपदासाठी शिफारस होऊ शकते. परंतु भाजपने विरोधी पक्षनेता व गटनेता अशी दोन पदे निर्माण केल्याने या पक्षाचे नगरसेवकही संभ्रमात पडले आहेत. शिंदे सभागृह नेते झाले तर, ते पालिकेतील भाजपचेच नव्हे तर सर्व विरोधी पक्षांचे प्रमुख होतील. परंतु ते तांत्रिकदृष्ट्या विरोधी पक्षनेतेपदी बसूच शकत नाहीत अशी स्थिती आहे. फेब्रुवारी २०१७ मध्ये झालेल्या महापालिका निवडणुकीनंतर शिवसेना क्रमांक एकचा, तर भाजप दुसऱ्या क्रमांकाचा पक्ष ठरला. त्यामुळे भाजपाला विरोधी पक्षनेतेपद मिळाले असते. महापौरांनी भाजपला विरोधी पक्षनेतेपद स्वीकारण्यासाठी पाचारण असता, 'आम्ही पहारेकऱ्या'च्या भूमिकेत राहणार असल्याचे पक्षाने सांगितले. त्यामुळे तिसऱ्या क्रमांकावरील काँग्रेसला विरोधी पक्षनेतेपदासाठी आमंत्रित करण्यात आले. काँग्रेसने या पदावर ज्येष्ठ नगरसेवक रवी राजा यांची निवड केली. त्यामुळे रवी राजा राजीनामा देईपर्यंत भाजपला प्रभाकर शिंदे यांच्या नावाची घोषणा करता येणार नाही.
विरोधी पक्षनेतेपदाची घोषणा करण्याचा अधिकार हा महापौरांचा आहे. सध्या शिवसेना व भाजपचे बिनसल्यामुळे महापौरही भाजपाला विरोधी पक्ष नेतेपदापासून दूर ठेऊ शकतात. मात्र, काँग्रेस व राष्ट्रवादी काँग्रेस शिवसेनेसोबत सत्तेत सहभागी झाल्यास भाजपला विरोधी पक्षनेतेपद मिळू शकेल.
आक्रमकतेसाठी शिरसाट
सध्या विविध समित्यांच्या बैठकीत, सभागृहाच्या बैठकीत शिवसेना दोन्ही काँग्रेसला दिमतीला घेऊन भाजपवर कुरघोडी करण्याची एकही संधी सोडत नाही. या तिन्ही पक्षांच्या आक्रमणामुळे भाजप काहीसा बचावात्मक पवित्र्यात आहे. त्यामुळे पक्षाला आक्रमक करून एकूणच पक्षाची कामगिरी उंचावण्यासाठी भालचंद्र शिरसाट यांना भाजपने प्रभारीपद दिल्याचे दिसते.
भाजपची नवी कार्यकारिणी
विरोधी पक्षनेते- प्रभाकर शिंदे
गटनेते- विनोद मिश्रा
उपनेते- उज्ज्वला मोडक, रिटा मकवाना
मुख्य प्रतोद- सुनिल यादव
भाजपा गटाचे प्रभारी- भालचंद्र शिरसाट