प्रत्युषानं आत्महत्येआधी गर्भपात केला होता!

मटा ऑनलाइन वृत्त । मुंबई

'बालिका वधू'फेम प्रत्युषा बॅनर्जी ही गर्भवती राहिली होती आणि आत्महत्येआधी काही दिवस आधीच तिनं गर्भपात केला होता,' अशी माहिती जे. जे. रुग्णालयाच्या डॉक्टरांनी दिली आहे. प्रत्युषाच्या गर्भाशयातील पेशींच्या चाचणीअंती डॉक्टरांनी हा निष्कर्ष काढला आहे.

जे. जे.च्या सूत्रांनी 'टाइम्स ऑफ इंडिया'ला दिलेल्या माहितीनुसार, मृत्यूच्या काही दिवस आधी किंवा साधारण महिनाभर आधी प्रत्युषा गर्भवती राहिली होती. मात्र, तिच्या गर्भाशयातील भ्रूण पूर्ण वाढण्याआधीच मृत झाले होते. गर्भधारणा टाळण्याच्या प्रयत्नातून नाळेला संसर्ग होऊन हे घडले असावे, असा डॉक्टरांचा अंदाज आहे. असं असलं तरी गर्भाशय साफ करण्यात आल्यानं डीएनए चाचणीतूनही प्रत्युषाच्या मृत बाळाचा पिता कोण हे ठरवणं आव्हान असल्याचं तज्ज्ञांचं म्हणणं आहे.

प्रत्युषा ही राहुलराज सिंग यांच्यासोबत 'लिव्ह-इन रिलेशनशीप'मध्ये होती. आत्महत्येआधी त्यांच्यात बिनसले होते, हेही चौकशीतून समोर आलं आहे. मात्र, प्रत्युषाच्या गर्भावस्थेचा काळ नेमका कोणता होता आणि त्यासाठी कोण जबाबदार आहे, हे वैद्यकीय अहवालात नमूद करण्यात आलेलं नसल्याचं समजतं. जे. जे. रुग्णालयाचे अधिष्ठाता डॉ. तात्याराव लहाने यांनी याविषयी काहीही सांगण्यास नकार दिला. 'अहवालातील निष्कर्ष आम्ही उघड करू शकत नाही. अहवाल पोलिसांना देण्यात आला आहे,' इतकंच त्यांनी सांगितलं. प्रत्युषाच्या मृत्यूचं नेमकं कारण काय, याची चौकशी एकाचवेळी अनेक पातळ्यांवर सुरू आहे. आतापर्यंत शवविच्छेदनाचा प्राथमिक अहवाल हाती आला आहे. त्यानुसार प्रत्युषाचा मृत्यू गळ्याभोवती दोर आवळल्यानं गुदमरून झाल्याचं समोर आलं आहे.