प. रे. लोकलप्रवास महागणार?

प. रे. लोकलप्रवास महागणार?
तिकीट दरांच्या टप्प्यांमध्ये बदलाचा प्रस्ताव
म. टा. खास प्रतिनिधी, मुंबई
पश्चिम रेल्वेने उपनगरीय मार्गावरील सध्याच्या तिकीट दरांसाठी असलेल्या टप्प्यांमध्ये बदल करण्याचा प्रस्ताव सादर केला असून, त्यानुसार कमी अंतरावरील प्रवासासाठी कमी तर जास्त अंतरासाठी जास्त तिकीट दर असे सूत्र सुचवण्यात आले आहे. हा प्रस्ताव रेल्वे बोर्डाने मंजूर केल्यास प. रेल्वेचा लोकलप्रवास महागण्याची शक्यता आहे.
लोकल मार्गावर दोन स्टेशनांदरम्यानचा प्रवास करायचा असल्यास किमान पाच रुपयांचे तिकीट घ्यावे लागते. त्यात दोन स्टेशनांपुढील काही स्टेशनांचा समावेश होतो. त्यामुळे हा टप्पा बदलण्याची सूचना करण्यात आली आहे. या प्रस्तावानुसार ​चार टप्प्यांमध्ये नवीन दरपत्रक सुचवण्यात आले आहे. तसेच, फर्स्ट क्लास आणि सेकंड क्लासच्या तिकीट, पासांतील दरांमधील फरकही कमी केला जाणार असून, सेकंड क्लास तिकीट, पासांतील दरात वाढ करण्याची सूचना आहे.
चर्चगेट ते अंधेरीपर्यंतच्या २१ किमीसाठी तिमाही पास २१५ रुपयांचा आहे. तर भाईंदरपर्यंतच्या ४४ किमीसाठीही २१५ रु. आकारले जातात. हा फरक संपुष्टात आणण्यासाठी हा टप्पा रद्द करण्यात येणार आहे. दैनंदिन तिकिटांसाठी चर्चगेट ते दादर किंवा अंधेरीसाठी १० रु. तिकीट रु. असा प्रस्ताव आहे. त्यापुढे मालाडपर्यंतच्या प्रवासासाठी जादा रक्कम द्यावी लागेल.
रेल्वेच्या ०-९ किमीसाठी ५ रुपये तिकिट आकारण्यात येते. सीएसटी ते दादरसाठी (९ किमी) ५ रुपये, तर चर्चगेट ते दादरसाठी (१०किमी) १० रु. तिकीट आहे. सीएसटी-विलेपार्लेसाठी (हार्बरमार्गे, १८ किमी) १० रु. तर चर्चगेट-विलेपार्लेसाठी १५ रु. तिकीट आहे. ही विसंगती दूर करण्यासाठी हा प्रस्ताव तयार केला आहे.