मध्य रेल्वेवर पुन्हा खोळंबा

कल्याणजवळ मंगला एक्स्प्रेसच्या इंजिनचे चाक घसरले

म. टा. खास प्रतिनिधी, मंुबई/म. टा. वृत्तसेवा कल्याण

मध्य रेल्वेवर गेल्या रविवारपासून सुरू असलेला वाहतुकीचा गोंधळ शुक्रवारीही कायम होता. मुंबईहून निघालेल्या मंगला लक्षद्वीप एक्स्प्रेसच्या इंजिनाचे चाक कल्याण स्थानकाजवळ दुपारी दोनच्या सुमारास घसरल्याने या मार्गावरील वाहतून सुमारे दोन तास खोळंबली.

त्यामुळे मेल‍ आण‌ि एक्स्प्रेसप्रमाणेच मध्य रेल्वेच्या लोकल वाहतुकीलाही फटका बसला. चारच्या सुमारास दुरुस्तीचे काम पूर्ण झाल्यानंतर वाहतूक हळूहळू पूर्ववत झाली. मात्र संध्याकाळी उश‌रिापर्यंत अनेक फेऱ्या रद्द करण्यात आल्या.

कल्याण येथे दुपारी दोनच्या सुमारास एर्नाकुलमकडून हजरत निजामुद्दीनच्या दिशेने जाणारी मंगला एक्स्प्रेस कल्याण रेल्वे स्थानकाजवळ पोहोचताच तिथल्या वळणावर गाडीच्या इंजिनाचे चाक रुळावरून घसरले. त्यानंतर तात्काळ दुरुस्ती हाती घेण्यात आली.

मात्र त्यासाठी सुमारे अडीच तासांचा कालावधी लागल्याने लोकल वाहतुकीवरही परिणाम झाला. त्यात कसाऱ्याच्या दिशेने जाणारी वाहतूक पूर्णपणे तर कर्जतकडील वाहतूक काही काळासाठी थांबविण्यात आली. चाकरमान्यांना होणारा त्रास लक्षात घेऊन टिटवाळा-आसनगाव आणि डोंबिवली ते ठाण्यादरम्यान २५ विशेष फेऱ्या चालविण्यात आल्या.

हार्बरवरही कपल‌िंग तुटले

हार्बर मार्गावरही ट्रॉम्बे येथे कुर्ला यार्डाच्या दिशेने जाणाऱ्या एका मालगाडीतील दोन डब्यांना जोडणारे कपलिंग तुटल्याने दुपारी दुपारी २.१३च्या सुमारास या मार्गावरील सेवा काही काळासाठी विस्कळीत झाली. हा बिघाड १७ मिनिटांत दुरुस्त करण्यात आला. मात्र लोकल वाहतुकीला त्याची झळ बसली.

प्रवाशांना चहा, पाणी आणि बिस्कीटे

इंजिन रुळावरून घसरल्याने या गाडीत अडकलेल्या प्रवाशांना मध्य रेल्वेकडून चहा, बिस्कीटे आणि पाण्याच्या बाटल्या मोफत देण्यात आल्याची माहिती मध्य रेल्वेचे मुख्य जनसंपर्क अधिकारी सुनील उदासी यांनी दिली.