शिक्षणमंत्र्यांच्या घराबाहेर उभारली काळी गुढी

मुंबई: तब्बल २७ हजार शिक्षक व शिक्षकेतर कर्मचाऱ्यांचे वेतन रखवडणाऱ्या शिक्षण विभागाचा निषेध करण्यासाठी महाराष्ट्र राज्य शिक्षक परिषदेने आज अभिनव आंदोलन केले. परिषदेच्या कार्यकर्त्यांनी सकाळी शिक्षणमंत्री विनोद तावडे यांच्या बंगल्यात घुसून काळी गुढी उभारली.

शिक्षक परिषद मुंबई विभागाचे अनिल बोरनारे यांच्या नेतृत्वाखाली हे आंदोलन झाले. परिषदेचे सुभाष अंभोरे, बी. डी. घेरडे, प्रा. नरेंद्र पाठक व अन्य कार्यकर्त्यांनी आज सकाळीच तावडेंच्या बंगल्याच्या दिशेनं कूच केलं. तिथं तावडे यांच्या बंगल्याच्या आवारात घुसून मुख्य दरवाज्यात काळी गुढी उभाली आणि निषेध व्यक्त केला. तसंच, ही काळी गुढी तावडेंना भेट दिली.