म. टा. प्रतिनिधी, मुंबई
'सुखोई ३०' विमानाचे चाक धावपट्टीवर फुटल्याने पुण्याचे विमानतळ सकाळी ९ ते दुपारी ३ पर्यंत बंद होते. यामुळे त्या विमानतळावर येणारी विमाने अन्यत्र हलविण्यात आली. त्यापैकी दोन विमाने मुंबईच्या छत्रपती शिवाजी महाराज आंतरराष्ट्रीय विमानतळावर हलविण्यात आली.
विस्तारा एअरलाइन्सचे दिल्ली-पुणे विमान दुपारी १२.३० च्या सुमारास मुंबई विमानतळावर उतरले. याखेरीज स्पाइसजेटचे बेंगळुरू-पुणे विमानही दुपारी १ च्या सुमारास मुंबई विमानतळावर उतरले. वास्तवात पुणे विमानतळासाठी सर्वात जवळचे विमानतळ मुंबईचे आहे. पण हे विमानतळ आधीच व्यग्र असल्याने अनेक विमाने मुंबईखेरीज अन्यत्र वळविण्यात आली, असे सूत्रांनी सांगितले.