विठ्ठलवाडीजवळ रुळाला तडा, वाहतुकीचा खोळंबा

मटा ऑनलाइन वृत्त । मुंबई

कल्याण-कर्जत मार्गावरील विठ्ठलवाडी स्टेशनजवळ रेल्वे रुळाला तडा गेल्यानं मध्य रेल्वेची सीएसटीकडे येणारी वाहतूक ऐन गर्दीच्या वेळी विस्कळीत झाली आहे. आठवड्याच्या पहिल्याच दिवशी ऑफिसला निघालेली नोकरदार मंडळी या बिघाडामुळे रखडली असून 'मरे'च्या नावानं शंख करत आहेत.

विठ्ठलवाडी स्टेशनजवळ रुळाला तडा गेल्याचे सकाळी साडेआठच्या सुमारास समोर आले. त्यानंतर सीएसटीकडे येणाऱ्या लोकल जागच्या जागी ठप्प झाल्या. रूळ दुरुस्त करण्याचं काम प्रशासनाने लगेचच हाती घेतलं आहे, पण वाहतूक पूर्वपदावर यायला आणखी वेळ लागेल.

रविवारच्या मेगाब्लॉकनंतर लगेचच सोमवारी मध्य रेल्वेवर काहीतरी तांत्रिक बिघाड होण्याच्या घटना अनेकदा घडल्या आहेत. त्याबद्दल प्रवाशांनी तीव्र नाराजी आणि संताप व्यक्त केला आहे. परंतु, 'मरे'चं रडगाणं काही केल्या संपत नाहीए.