वासिंदमधील रेल्वे प्रवाशांचा रेलरोको मागे

मटा ऑनलाइन वृत्त । मुंबई

गेल्या तीन दिवसांपासून कल्याण ते कसारा लोकल सेवा ठप्प असल्याने आज प्रवाशांचा उद्रेक झाला. वासिंद येथे संतप्त रेल्वे प्रवाशांनी रेल्वे रूळावर उतरून दादर-अमृतसर रेल्वे रोखून धरली. या रेलरोके मुळे कसाऱ्यामार्गे जाणाऱ्या लांब पल्ल्यांच्या गाड्यांचा खोळंबा झाला. यावेळी प्रवाशांनी जोरदार घोषणाबाजी करत रेल्वे प्रशासनाचा निषेधही नोंदविला. मात्र रेल्वे पोलिसांनी केलेल्या हस्तक्षेपानंतर प्रवाशांनी ३५ मिनिटांनी रेलरोको मागे घेतला.

बुधवारी पहाटे साडे सहाच्या सुमारास वासिंद-आसनगाव स्थानका दरम्यान दुरांतो एक्सप्रेसचे नऊ डबे रूळावरून घसरले होते. त्यामुळे या मार्गावरील सर्व रेल्वेसेवा बंद ठेवण्यात आल्या होत्या. रेल्वे डबे रूळावरून काढण्यासाठी सहा ते सात तास लागतील असं प्रशासनाने सांगितलं होतं. मात्र हे काम सात तासात पूर्ण झालं नाही. त्यानंतर गुरूवारी रात्री दहापर्यंत हे काम पूर्ण होणार असल्याची नवी डेडलाइन रेल्वेनं दिली होती. पण या डेडलाइनमध्येही काम पूर्ण झालं नाही. त्यामुळे दोन दिवस कामावर जाऊ न शकलेल्या चाकरमान्यांचा आणि विद्यार्थ्यांच्या संतापाचा कडेलोट झाला.

वेळेवर रेल्वे स्टेशनवर येऊनही आजही गाडी येत नसल्याचे पाहून प्रवाशी संतप्त झाले. त्यातच लांब पल्ल्याच्या गाड्या सुरू असल्याचं पाहून प्रवाशांचा पारा अधिकच चढला. त्यामुळे संतप्त झालेल्या प्रवाशांनी रेल्वेरूळावर उतरून दादर-अमृतसर एक्सप्रेस रोखून धरत जोरदार घोषणाबाजी द्यायला सुरूवात केली. प्रवाशांचा रेलरोको सुरू असल्याचं कळताच रेल्वे पोलिसांनी घटनास्थळी धाव घेऊन प्रवाशांना पांगविण्याचा प्रयत्न केल्यानं या परिसरात तणावाची परिस्थिती निर्माण झाली होती. ३५ मिनिटे रेलरोको केल्यानंतर पोलिसांच्या हस्तक्षेपानंतर प्रवाशांनी रेलरोको मागे घेतला.