एक्स्प्रेसमध्ये सामान भरण्यासाठी ओढली साखळी

- जम्मू-तावी एक्स्प्रेसमधील प्रकार

- वेळ न पुरल्याने लढवली शक्कल

- एसी डब्याच्या सहाय्यकावर कारवाई

म. टा. खास प्रतिनिधी, मुंबई

रेल्वेगाड्यांतील साखळी खेचण्याबाबतच्या प्रकारांत एरवी प्रवाशांच्या बेदरकारपणाचा अनुभव घेणाऱ्या रेल्वेला गुरुवारी चक्क रेल्वे कर्मचाऱ्याच्याच अजब वर्तनामुळे फटका बसला. वांद्रे टर्मिनसहून सुटलेल्या जम्मू-तावी एक्स्प्रेसमधील सहाय्यकाला एसी डब्यातील चादरी व अन्य सामान भरण्यासाठी वेळ न पुरल्याने त्याने साखळी खेचल्याचे चौकशीत समोर आले आहे. याबद्दल रेल्वे सुरक्षा बलाने (आरपीएफ) त्याच्यावर कारवाई केली आहे. या गोंधळामुळे पश्चिम रेल्वेला १० लोकलफेऱ्या रद्द कराव्या लागल्या.

जम्मू-तावी एक्स्प्रेसमधील बी-५ डब्यात चादरींसह अन्य सामान भरण्याची जबाबदारी सहाय्यकांकडे असते. तेजपाल सिंह या सहाय्यकाकडे ते काम होते. सिंह याने बुधवारी रात्रीच एक्स्प्रेसच्या डब्यात हे सामान भरावे, अशी सूचना करण्यात आली होती. पण सिंह याने रात्री ते काम पूर्ण केले नाही. सकाळी सामान भरत असतानाच एक्स्प्रेस सुटण्याची वेळ झाली. हे पाहून सिंह याने साखळी खेचली. त्यामुळे ही एक्स्प्रेस २५ मिनिटे स्थानकात खोळंबली. यामुळे लोकलसेवेलाही फटका बसला आणि ऐन गर्दीच्या वेळी प्रवाशांचे हाल झाले.

याच एक्स्प्रेसच्या दुसऱ्या डब्यात आणखी एका सहाय्यकाने प्रवाशांना चादरी देण्यास नकार दिल्याचेही समोर आले आहे. बी-४ डब्यातील सहाय्यक मोहम्मद गुलजार याने बी-५ मधील प्रवाशांना चादरी मिळणार नसल्याचे सांगताच प्रवासी संतप्त झाले. गाडी उशिरा सुटण्यासाठी कारणीभूत ठरवून गुलजार याच्यावरही आरपीएफने कारवाई केली आहे.