मुंबई आणि ठाणे जिल्ह्यात उद्या गडगडाटासह पाऊस

मुंबई:

उन्हाच्या काहिलीने त्रस्त झालेल्या आणि पावसाच्या प्रतीक्षेने आसुसलेल्या मुंबई-ठाणेकरांसाठी एक आनंदाची बातमी आहे. मुंबई आणि ठाणे जिल्ह्यात उद्या मंगळवारी ढगांच्या गडगडाटासह आणि विजांच्या कडकडाटासह पाऊस कोसळण्याची दाट शक्यता मुंबई प्रादेशिक हवामान विभागाने वर्तवली आहे. मुंबईसह संपूर्ण कोकणात हा पाऊस होणार आहे.

मुंबई, ठाणे आणि पालघर जिल्ह्यात मंगळवार हा पावसाचा वार ठरण्याची शक्यता आहे. अर्थात केरळात दाखल झालेल्या मोसमी पावसाने अद्याप राज्यात वर्दी दिलेली नाही. त्यामुळे उद्याचा पाऊसदेखील पूर्व मोसमीच असेल. किंबहुना या पावसाची वर्दी आज सोमवारी रात्री उशिरा मिळण्याची शक्यता आहे.

अरबी समुद्रातील दक्षिणपूर्व भाग, लगतचा लक्षद्वीप आणि मध्यपूर्व भागात कमी दाबाचा पट्टा निर्माण झाल्याने हा पाऊस पडणार आहे.