'शिवसेनेचा महापौर बंगल्यावर डोळा'

मटा ऑनलाइन वृत्त । मुंबई

दिवगंत शिवसेनाप्रमुख बाळासाहेब ठाकरे यांच्या स्मारकाच्या नावाखाली शिवसेनेची महापौर बंगल्यावर नजर आहे आणि म्हणूनच शिवसेना अजुनही भाजपसोबत सत्तेत असल्याचा गंभीर आरोप महाराष्ट्र नवनिर्माण सेनेचे अध्यक्ष राज ठाकरे यांनी केला. दादरमध्ये मनसे कार्यकर्त्यांच्या मेळाव्यात बोलताना त्यांनी शिवसेना व भाजपवर जोरदार हल्ला चढवला. भाजपला महाराष्ट्रापासून मुंबई तोडायची असल्याच्या आरोपाचा पुनरुच्चार राज यांनी केला.

महापालिका निवडणुका जाहीर झाल्यानंतर पहिल्यांदाच राज ठाकरे यांनी मनसे कार्यकर्त्यांना संबोधित केले. भाजपला रोखण्यासाठी शिवसेनेसमोर युतीचा प्रस्ताव पाठवला होता अशी कबुली राज ठाकरे यांनी दिली. युती नाही तर ठिक आता स्वबळावर लढणार आणि प्रचारात मुंबई महापालिकेच्या कारभाराचे वाभाडे काढणार असल्याचे राज ठाकरे यांनी स्पष्ट केले. स्वत:साठी, पक्षासाठी नाही पण मराठी माणसाच्या हितासाठी कोणाचेही पाय चाटण्यास तयार आहोत. मात्र, मुंबईला महाराष्ट्रापासून कोणी वेगळी करत असेल तर त्याचे पाय छाटू असा इशारा राज ठाकरे यांनी दिला. भाजपला मुंबई राज्यापासून वेगळी करायची आहे. आधी विदर्भ वेगळा करतील मग मुंबईला वेगळी करण्याचा पंतप्रधान नरेंद्र मोदी आणि भाजप अध्यक्ष अमित शहा यांचा डाव आहे, असा आरोप राज यांनी केला. मराठी मतं फोडत असल्याचा मनसेवरील आरोप हा खोटा प्रचार असल्याचं राज म्हणाले.


राज ठाकरे यांच्या भाषणातील मुद्दे :

> पुढील १८ दिवस बोलायचं आहे.. आज सगळं पोतड्यातून बाहेर नाही काढणार
> भाजपच्या नेत्याच्या मनात काय वळवळत आहे हे मला ठावूक आहे
> भाजप नको म्हणून हात पुढे केला..आता वाभाडे ही काढू, कपडे ही फाडू
> भाजप नको म्हणून युतीसाठी सात वेळा फोन केला
> देशात हुकुमशाही सुरू आहे
> माझ्याविरोधात लिहीत आहात लिहा..पण कालांतराने चूक उमगेल
> नाशिकमध्ये पाच वर्षात मनसेने जे काम केले ते या २५ वर्षात मुंबईत शिवसेना-भाजपने केले नाही
> थापा या शब्दाला पर्यायी भाजपा...
> फेकू हा शब्द गुगलवर सर्च करा.. मोदींचे नाव आढळेल