राज ठाकरे राजकारणात अनफीट: संजय राऊत

मटा ऑनलाइन वृत्त । मुंबई

राजकारणामध्ये आपल्याकडील गुपीतं कधीही जाहीर करायची नसतात. अशी गुपीतं जाहीर करणारे नेते राजकारणासाठी सक्षम नसतात, असं सांगत उद्धव ठाकरे यांना मी सात वेळा फोन केला होता असं जाहीर करणं चुकीचं आहे, असा टोला शिवसेना नेते संजय राऊत यांनी मनसे अध्यक्ष राज ठाकरे यांना लगावला.

एका वृत्तवाहिनीला दिलेल्या मुलाखतीत संजय राऊत यांनी राज ठाकरे यांचे नाव न घेता ते राजकारणात अनफीट असल्याची टीका केली. राज ठाकरे हे उद्धव ठाकरे यांचे भाऊ आहेत. त्यांनी उद्धव यांना कितीही फोन करावेत, त्यांना येऊन भेटावे यात दुमत नाही. पण कुणालाही फोन केला असेल तर ते उघड करू नये. राजकारणाचा हा मुलमंत्र आहे. आपल्याकडची गुपितं कधीच जाहीर करायची नसतात, असं ते म्हणाले. आम्हाला युतीचं राजकारण करायचं नाही. स्वबळावरच लढायचं आहे. त्यामुळेच महाराष्ट्रात कुणाबरोबर युती केली नसल्याचं सांगत त्यांनी मनसेबरोबर युती न करण्याच्या कारणांची मिमांसा केली.

बाबरी प्रकरणानंतर शिवसेना उत्तरप्रदेशमध्ये निवडणुका लढली असती तर ६० ते ६५ जागा मिळाल्या असत्या. पण भाजप नेत्यांनी विनंती केल्यामुळे आम्ही लढलो नाही, असं सांगतानाच शंकरराव वाघेलाही शिवसेनेत येणार होते, असा गौप्यस्फोटही राऊत यांनी केला. आताची राजकीय परिस्थिती पाहता विश्वासघाताचं राजकारण झालं. शिवसेनेचं खच्चीकरण करण्याचा प्रयत्न झाला, असंही त्यांनी सांगितलं.