राज यांच्या निशाण्यावर मोदी आणि फडणवीस

वसई :

मनसे अध्यक्ष राज ठाकरे यांनी आज वसईत घेतलेल्या जाहीर सभेतून पुन्हा एकदा पंतप्रधान नरेंद्र मोदी, मुख्यमंत्री देवेंद्र फडणवीस आणि भाजपवर जोरदार शब्दांत निशाणा साधला. मी जे मोदी पाहिले होते ते मोदी हे नाहीत. पंतप्रधान झाल्यानंतर नरेंद्र मोदी पूर्णपणे बदलले आहेत. इतका माणूसघाणा पंतप्रधान भारताच्या इतिहासात झाला नाही. कुणाशी बोलायचं नाही, कुणाचं ऐकायचं नाही, मनात आलं आणि केली नोटाबंदी, असा कारभार चालला आहे, अशा शब्दांत राज यांनी तोफ डागली. यावेळी देवेंद्र फडणवीस यांना राज यांनी रामदास पाध्ये यांच्या बोलक्या बाहुल्याची उपमा दिली.

राज ठाकरे यांचा बहुचर्चित महाराष्ट्र दौरा आज महाराष्ट्र दिनाच्या मुहूर्तावर पालघर जिल्ह्यातून सुरू झाला. या दौऱ्यात वसईची सभा वगळता ते केवळ जनतेशी संवाद साधणार आहेत. त्याचा आपल्या भाषणात उल्लेख करत राज यांनी चौफेर टोलेबाजी केली. पंतप्रधान मोदी यांनी लंडनमध्ये जाऊन भारतीय डॉक्टरांचा अपमान केल्याबद्दल त्यांनी तीव्र नाराजी व्यक्त केली. बघावं तेव्हा हे देशाबाहेर असतात. तिकडे लंडनमध्ये जाऊन आपल्या डॉक्टरांची इज्जत चव्हाट्यावर मांडली. सारखं तिकडेच जायचंय तर मग इकडे तुम्ही येता तरी कशाला. तिकडेच राहा ना, असा उपरोधिक सल्लाही राज यांनी दिला.

बुलेट ट्रेन होऊ देणार नाही!

मराठी बांधवाना आणि भगिनींना माझी विनंती आहे, बेसावध राहू नका. चिमाजी अप्पांच्या भूमीत आपण जमलो आहोत. चिमाजी अप्पांचं शौर्य तुम्ही दाखवा. जगातल्या सगळ्या लढाया या जमिनीसाठी झाल्यात. आज कोकणातील मराठी माणूस, ठाण्यातील मराठी माणूस आपल्या जमिनी चार पैशांकरता फुकून टाकतोय. उद्या तुमच्या जमिनीही जातील. इंच इंच जमीन विकली जाईल आणि आपल्याच राज्यात बेघर व्हाल, अशा शब्दांत सावधगिरीचा इशारा देताना बुलेट ट्रेन आणि मुंबई-बडोदा एक्स्प्रेस वे कदापि होऊ देणार नाही, असे राज यांनी ठणकावले.

पाहा: राज ठाकरे यांचं संपूर्ण भाषण