‘जीवनदायी’: गरीब रुग्णांच्या पैशावर डल्ला

मुंबई: गोरगरीब आणि गरजू रुग्णांना सक्षम आरोग्यसेवा मिळाव्यात यासाठी राजीव गांधी जीवनदायी योजना सुरू करण्यात आली खरी, पण प्रत्यक्षात या योजनेअंतर्गत मिळणारा पैसा गरीब रुग्णांना न मिळता त्यावर सरकारी कर्मचारीच डल्ला मारत असल्याची घटना समोर आली आहे. या प्रकरणी माता रमाबाई आंबेडकर पोलिस ठाण्यात सेंट जॅार्ज हॉस्पिटलचा कर्मचारी दिलीप पवार याच्याविरोधात गुन्हा नोंदवण्यात आला असून पोलिस त्याचा शोध घेत आहेत.

कफ परेड परिसरात राहणारे तक्रारदार शिवकुमार कनोजिया हे टॅक्सीचालक असून त्यांच्या नातलग संगीता कनोजिया यांना मूतखड्याचा त्रासामुळे सेंट जॅार्ज रुग्णालयात १० डिसेंबरला दाखल केले होते. २० डिसेंबर रोजी संगीता यांच्यावर शस्त्रक्रिया करण्यात येणार होती व तिचा खर्च राजीव गांधी जीवनदायी योजनेतून केला जाणार होता. शस्त्रक्रियेच्या दिवशी डॉक्टरांनी सांगितल्यानुसार शिवकुमार यांनी समर्थ मेडिकलमधून ९०० रुपयाचे एक औषध आणून दिले. शस्त्रक्रिया सुरू असतानाच ऑपरेशन थिएटरमधून तोंडाला मास्क लावून आलेल्या एकाने डॉक्टरांनी औषधाचे बिल मागितल्याचे शिवकुमार यांना सांगितले. शिवकुमार यांनी बिल दिले, पण ते त्यांना पुन्हा देण्यात आले नाही. हेच बिल दाखवून शिवकुमार यांना रुग्णाच्या उपचाराचा खर्च राजीव गांधी योजनेतून चेकद्वारे मिळणार होता.

त्यामुळे शिवकुमार यांनी डॉक्टरांकडे बिलाबाबत विचारणा केली. मात्र, बिल मागवलेच नसल्याचे डॉक्टरांनी सांगितले. घाईगडबडीत बिल हरवले असावे, हा अंदाज लावत शिवकुमार समर्थ मेडिकलमध्ये डुप्लिकेट बिल घेण्यासाठी गेले. त्यावेळी, हे बिल ऑपरेशन थिएटरमध्ये काम करणारा चतुर्थश्रेणी कर्मचारी दिलीप पवारने दाखवून औषधे परत करून पैसे घेतल्याचे दुकान चालकाने सांगितले. दुकानातील सीसीटीव्ही फुटेजमध्ये या घटनेची पुष्टी झाली.

तक्रार करताच कर्मचारी फरार

शिवकुमार यांनी जे.जे. रुग्णालयाचे डीन डॉ. तात्याराव लहाने यांच्याजवळ दिलीपच्या या फसवणुकीची तक्रार केली. डॉ. लहानेंनी शिवकुमार यांना पोलिसात जाण्याचा सल्ला दिला व त्यानुसार शिवकुमार यांनी २१ माता रमाबाई पोलिस ठाण्यात तक्रार दिल्यानंतर पोलिसांनी दिलीपविरोधात गुन्हा नोंदवला आहे. फरार दिलीपचा पोलिस शोध घेत आहे.