जानकरांपाठोपाठ आणखी एक मित्र मविआपासून दूर; जयंत पाटलांचा बदलला सूर; गणित फिस्कटणार?

मुंबई: राष्ट्रीय समाज पक्षाचे अध्यक्ष महादेव जानकर महाविकास आघाडी सोबत जातील, त्यांना माढ्याची उमेदवारी मिळेल, अशी चर्चा असताना अचानक त्यांनी महायुतीची वाट धरली. महायुतीनं त्यांना परभणीची जागा दिली आहे. ही माहिती खुद्द जानकर यांनी दिली आहे. यानंतर आता स्वाभिमानी शेतकरी संघटनेच्या राजू शेट्टींना सोबत घेण्याची तयारी महायुतीनं सुरू केली आहे.

हातकणंगले मतदारसंघातून राजू शेट्टी महाविकास आघाडीकडून लढतील अशी चर्चा होती. यासंदर्भात त्यांनी शिवसेना उबाठाचे प्रमुख उद्धव ठाकरेंची भेटही घेतली. हातकणंगलेत मविआ राजू शेट्टींना पाठिंबा देणार असल्याची चर्चा सुरू होती. पण आता वेगळ्याच घडामोडी घडत आहेत. त्यामुळे जानकरांपाठोपाठ शेट्टीदेखील महाविकास आघाडीची साथ सोडणार का, असा प्रश्न निर्माण झाला आहे.
नाथाभाऊंचा उल्लेख, महाजनांचं नाव का घेत नाही? रक्षा खडसेंना कार्यकर्त्यांचा सवाल, बैठकीत वाद
जयंत पाटलांचा सूर बदलला
हातकणंगलेमध्ये राजू शेट्टी आमच्यासोबत असावेत असं आम्हाला वाटत होतं. पण त्यांचा वेगळा पवित्रा दिसतो. शिवसेना नेत्यांसोबत त्यांच्या भेटीगाठी, बैठका सुरू असल्याचं मला समजलं. ते मविआसोबत येतील अशी अपेक्षा होती. पण सध्याचं चित्र मला दिसत नाही. आता त्यांनी महाविकास आघाडीचा पाठिंबा घेतला नाही तर मग आम्हाला वेगळा विचार करावा लागेल. आम्हाला त्या मतदारसंघात उमेदवार द्यावा लागेल, असं राष्ट्रवादी शरद पवार गटाचे प्रदेशाध्यक्ष जयंत पाटील यांनी सांगितलं.
साताऱ्याची जागा राजेंना, राष्ट्रवादी-भाजपचं ठरलं?; पण दादा गटाच्या मागणीनं शिंदेंची कोंडी
माझी भूमिका एकला चलो रेची- शेट्टी
जयंत पाटील यांच्या भूमिकेनंतर राजू शेट्टी यांनी एका वृत्तवाहिनीशी संवाद साधला. यावेळी त्यांनी आपली भूमिका स्पष्ट केली. माझी भूमिका एकला चलो रेचीच आहे. उद्धव ठाकरेंसोबत भेट घेतल्यानंतर पुन्हा कोणाशी बोलणं झालं नाही. भाजपचा पराभव करायचा असल्यास मविआनं उमेदवार उभा करू नये. हातकणंगलेतून मी उभा राहणारच आहे, असं शेट्टी म्हणाले.